في حق ابا الفضل العباس عليه السلام
…………………………………………..
زينب اجت له تنخاه .. يابو الفضل تترجاه
تترجى لطفال الجود
…………………………………………..
(1)
زينب اجت للعباس .. وتهل دمع سچابه
خويه بقلوب الاطفال .. نار العطش لهابه
خذ يا حبيبي هالجود .. للمشرعه اتعنى به
لو رحت عنّي ابعيد .. قلبي الحزن ينتابه
ولقنطره سَبعها .. من غيرك ايعبرها
تِرْجَع يروحي واتعود
…………………………………………..
(2)
يم الخدر لعيناچ .. هالطلبه بتلاقيها
سلّي الرباب ابهالحال .. لمن اجي خبريها
بالزهرا لقسم هاليوم .. هذا قسم يرضيها
والقربة لمليها ابماي .. بدينچ اترفْعِيها
يزينب احلى طَلْبه .. عليّه ماهي صعبه
لَخَلّي النهر بالجود
…………………………………………..
(3)
تبَسّم لخته من قال .. يا زينب اتْعُرْفيني
لسقي العطاشى لطفال .. ولجود يختي ابعيني
لمن ارِدْ ويا الجود .. عن حالچ اتخبريني
يا قمر هاشم مشكور .. مطمِّنَه اتخليني
جواده من صعدها .. واللحظه بس تعدها
زينب تِرْتجي اردود
…………………………………………..
(4)
لمن صعد فوق الخيل .. خلى الارض زلزاله
جوده نزل به لفرات .. صب النهر به اوشاله
يطبق اليمنى عالجيش.. والميسره تصفى له
لو قطعَوْ منه ايمين.. تحمل السيف اشماله
ظنوه فارس صفين .. بيها برز حامي الدين
اوعادْ ابْسِيفه لعهود
…………………………………………..
(5)
وصّل افراته عطشان .. نار العطش شظايه
لفرات خلّاه انهار .. لَمّن ركَزْها الرايه
لمن غرف بييده الماي .. ما شرب قطرة مايه
وابصدره حاضن للجود .. خلى الصدر له احمايه
والجود من حملها .. كل العساكر فلها
خلّاها اتصير فرهود
…………………………………………..
(6)
قتلى ترسها لطفوف .. من حيدره انفاسه
بن سعد بالحال احتار .. عباس يعرف باسه
آمَر ِاتْحيط العباس .. بالمشرعه حُرّاسه
واحسين قاتَل هالجيش .. لا ينقتل عبّاسه
يبو الباس الشديده .. درُب لُختك بعيده
وظني الدرب مسدود
…………………………………………..
(7)
يم الشريعه العباس .. طاح البطل لمشكر
قوم العدا من صابوه .. عباس هامه اطّبر
يم مصرعه راح احسين .. طاح اعلى اخوه وِتْحسر
من طيحتك يا عباس .. لحسين ظهْره اتكَسّر
راسه ابحضنه من مال .. وتوسد اعلى لرمال
تِحَسَّر ماله ازنود
…………………………………………..
ابو مصطفى
2 محرم 1440 هـ
12 سبتمبر 2018
