……………………………………….
سبي والخربه مسرح .. نظر هالناس يجرح
خَرْبة الشام علينا چنها ذيبه
……………………………………….
(1)
رحنا لعراق يعباس ابمهابه
وترك احسين ونا ابقلبي مصابه
جينا للشام ترافقنا العصابه
وُقْفَت النوق على باب الخرابه
بعد قَطْع المسافات .. وقَفْنا اعْليها ساعات
تصبح الشام على زينب غريبه
……………………………………….
(2)
زين لعباد تِألَّم من سبينا
يصرخ ابآه تِضِج كل الظعينه
يبچي يحسين ومن بَچْيّه بَچيْنه
صار بالقيد اثر من دم ايدينه
فوق الهزّل ايميل .. دم ابرقبته ايسيل
والله صعبه على الباقر نحيبه
……………………………………….
(3)
دخّلونا على المجلس أُسارى
جالس ايزيد على كرسي الاماره
وعْطى بالحال الى اجنوده اشاره
وين زينب وظن عنّي اتوارى
ظنُّك تمحي هالدين
يِحْيَى الدين بحسين
اول اسْهام من الحورى تصيبه
……………………………………….
(4)
رِدِت بحسين من الهادي اتِشفٌى
تِنْكث ابراس ولينا اوتدمي شِفّه
كيد كيِدك ترى خصمك تعرفه
والوعد يوم على المحشر نِوَگفَه
من خصمه النبي صار .. وعده ايصير بالنار
خصمه معروف رسول الله اوحبيبه
……………………………………….
(5)
خاب سَعْيَك اذا تنكر محمد
تدري جبريل نزل بيت الممجد
شاف لحسين بچى اوتالي تنهد
وابدم احسين يقول الدين ينقَد
وحلامك بعيده .. وذنوبك شديده
دعوة احسين على عمرك قريبه
……………………………………….
(6)
صوب المدينه نعت خوها الشفيه
صاحت يمختار انا زينب سبيه
ماجور جدي تنادي الهاشميه
لحسين مذبوح قضى بالغاضريه
من تشكي لبوها .. كلهم يسمعوها
تنصت الناس اذا زينب خطيبه
……………………………………….
(7)
زينب ابحال علي قمه اوفصاحه
قلبت الشام اوخلتها نياحه
نور للدين بدا يشرق صباحه
اليوم لسلام تِضَمِّد كل جراحه
ترد لرض المدينه .. الى الهادي نبينا
تُخْبُره احسين قضى اوخده تريبه
……………………………………….
ابو مصطفى ال يوسف
26 محرم 1440 هـ
6 اكتوبر 2018
