………………………………….
ياحسين ارواحنا ابدربك تِصُف
تِصير عشرين ابْصفر شمّاعه
تضوي ادروب العشق ما تِنْعرف
اتْذوب تالي اتصير شِمعه ابْساعه
………………………………….
(1)
تلبس الاحزان تمشي ومن تنام
تهبط ابحنّيه واتنادي الظلام
لا تِطِيل احسين رايدها سلام
وِيَاك بالعشرين يربطها التزام
وقّعت بِنْحورها عهد وشرف
حسين ما غيره نصير اتباعه
………………………………….
(2)
تسبق العشرين تِصْطف راجله
حول شباك الْضريحك نازله
تاخذ التصريح ترجع كامله
تفتح وباب المضايف شامله
تنادي يا زوار حياكم غُرَف
حسين يفتح بالمضيف اذراعه
………………………………….
(3)
تِنتفي الاعذار ما يُقبل عمل
بس عذر واحد يِخلي لك امل
بالمضيف اتقوم تخدم لا تِمل
تصير ويا الَملَك واتْلم الشمل
اربعين احسين هي اعظم ظَرُف
يطيب كل معلول من اوجاعه
………………………………….
(4)
سر صعب لليوم ماحد حدده
شفنا كم طفله وطفل ظل ينشده
يا الهي الكون عندي لك نده
بس امامي احسين ودني مشهده
طفل يعطي ادموع من جفنه ذَرَف
يشترى امن احسين احلى ابضاعه
………………………………….
(5)
نسأل الماشي ابجو الاربعين
الحال وصّف واختصرها ابكلمتين
لا مقاله لا شعر لا صفحتين
جنة الله بالارض بل جنتين
هذا عندي معتقد بِيه اعترف
ما انْعوف ونِدري امرك طاعه
………………………………….
(6)
الجنة يعني الماي من تحت النهر
بالمخيم نومها فوق السُرُر
تمشي والرايات سندسها خُضر
ايدها اتسبح أساور من زُهر
حجاب زينب مَقْنعه اسس عُرُف
يِنْسج استبرق سِتر واقْناعه
………………………………….
(7)
وشكثر ولدان بالخدمه اشوف
خالْدَه مادام زورارك ضيوف
تِنْحني تِقبّل قدم ويا الچفوف
ابْگربة العباس سقّايه تِطوف
سوت الگربه نهر چَنِّه جُرف
وادي بالريحان يِزْرع قاعه
………………………………….
(8)
مِيّمَر المنصوب من فوقه الدِلال
تفوح منها الطيب والماي الزلال
اتشمه مسك العود هم تنظر جَمال
تقول چَنْها الحور مرّت من خلال
النعيم إلْكان بالجنه انْعَرف
باربعين احسين شِفْنا انواعه
………………………………….
ابو مصطفى ال يوسف
17 صفر 1437 هـ
30 نوفمبر 2015
