في افراح ال البيت الشعبانية
…………………………………
ارضج يالمدينه تزهي بالنور
وملاك السما نزلت قوافل
على بيت البتوله تنشر اورود
وصلنا الطيب في وسط المحافل
تهني بالولاده المصطفى اليوم
تحمل للشمع تشعل مشاعل
تهني المرتضى ولحسن وياه
بولادة قمر والقمر كامل
اتصلي اعلى النبي برفع الاصوات
لعنان السما هالصوت واصل
واحنا من سمعنا الصوت عدناه
كررنا الصلاة اعلى الافاصل
تسألنا الملايك اجر لصوات
گلناها المحبه ابلا مقابل
ملايك لمن اتعدو الصلاوات
ردوا اشگد عمل لينا تعادل
گالَو لا نهايه الاجر مكتوب
شهاده بالعمل ولختم عامل
من غير العداله انساوي اثنين
واحد صلّى يبتر لنّه جاهل
واحد من يجي ذكر النبي ايقوم
واحد بالصلاة اتقول غافل
واحنا من نصلي واجب انقول
على طه النبي واله نواصل
اذا ردتو المفازه واجر لثنين
من نذكر علي زيدو الهلاهل
مابين النبي والمرتضى احدود
والزهرا وصل تلغي الفواصل
نزل جبريل يعطي طه لخبار
علي زوج البتوله ابخبر عاجل
صعبه اتلاقي حيدر مثله بالناس
عجل هالزهرا من ليها اسايل
الله من خلق حيدر ابهالكون
خلقها فاطمه الهذا التماثل
نعم تربط علاقه بين لثنين
نبوه اويا الامامه ابدين شامل
اذا ما ينولد كوثر الزهراء
يصير الكون يمشي ابلا جداول
يصير الارض تخضر ويا لشجار؟
اذا جف النبع وسط المشاتل
يصير الناس تروي عطش لفاد؟
اذا ماي الارض يشكي المناهل
يصير الغيم يتشكل سحابات؟
من دون البحر ويا السواحل
الهي ادوم نعمة حيدر اليوم
ترانا ابلا ولايه اشلون ناكل
شعبان الشهر تنولد لقمار
من ضيها ترى اتعيش السنابل
شفنا ابكربلا لليوم موجود
اثرهم تنقله كل الوسايل
ملاحمهم عظيمه اوليها سبّاچ
حوَت كل المعاني للتفائل
يصدح عالمنابر علم لطهار
يعطي اشگد حجج ويا الدلائل
واتشيد قببكم تبني عمدان
طول اسنين ماظل طوف مايل
على لِبس الموالي ابصدق مكتوب
فدوى انروح منحوته الفنايل
نعم منحوته آه يحسين لقلوب
وابقلبه الحسين الاه شايل
كل مولد الى الاطهار لزهور
ياخذها النحل وسط المناحل
يحسبنا النحل بعيونه زهرات
لهل البيت مجموعه ابخمايل
تالي من رحيقه الشهد منتوج
رحيق انفوسنا نفس الشمايل
فاته من يغيب المحفل اليوم
ماحد ياخذ ازهوره المعامل
من يحضر حفل لطهار موعود
يقدرونه اشكثر سوى جمايل
بالمولد اذا رادو يبخروك
هالمبخر الى جارك تناول
لا تخجل ولا تستصغر الماي
اذا بييدك تعب بالخدمه حاول
………………………………….
ابو مصطفى ال يوسف
2 شعبان 1440 هـ
8 مارس 2019
كربلاء قصر در الكاظمية
