…………………………………….
بيدي الورد النّفّاح .. جيتك شايل لَفْراح
…………………………………….
(1)
قاصد قربك يابو اليمه اتعنيت
يم محرابك يم سباچك صليت
فرض الواجب صليته لهل البيت
جالس عد بابك واتريّه لا جيت
وشعل بيدي المصباح .. جيتك شايل لَفْراح
…………………………………….
(2)
صحنك جنه لا ما عوفك يحسين
عباس ابصحنه هم جنه او نهرين
هامت روحي طارت بين الصحنين
تعلى ابمره تهبط مره اوثنتين
روحي وكل همها انزاح .. جيتك شايل لَفْراح
…………………………………….
(3)
قبل المولد سمعت لملاك الكون
تخلى المعوره بس من بيت اتكون
بيت العصمه ماحد مثله ايعدون
والعالم من حوله ابنظرت مفتون
والعالم يلهج راح .. جيتك شايل لَفْراح
…………………………………….
(4)
نزلت لعيا تروي قصه ابهالدار
جبريل اعلى الدار اتعنى ابلخبار
تحمل شمعه شافت بالبيت اقمار
سمعت سر واحد من جملة لسرار
سمعت جبريل ابراح .. جيتك شايل لَفْراح
…………………………………….
(5)
شالت لعيا مهد السبط ابليدين
شافت جنه من شالت مهد احسين
فتّح عينه سحرتها ارموش العين
نور اجبينه اومنها يسطع نورين
كل نور اليسطع لاح .. جيتك شايل لَفْراح
…………………………………….
(6)
طِيْبَه ابيوم المولد تلبس ياقوت
زيّن صدر الكون ابنحته المنحوت
اسم احسين الناحت نوح المنعوت
بس صوت امن العالي والناس اسكوت
نوح اتعنى ابلوشاح .. جيتك شايل لَفْراح
…………………………………….
(7)
كل اشهور الدنيا اتغارك شعبان
كل ساعات إلْمَرّت عادت ازمان
تحضر مولد سِيِد الإنِس والجان
تفرح للساده ابأمر امن الرحمان
كل وقت اليرجع صاح .. جيتك شايل لَفْراح
…………………………………….
ابو مصطفى ال يوسف
18 رجب 1439 هـ 4 ابريل 2018
