……………………………………..
باب الإرث والتوريث.. الله جَعلْها سُنه
ارض ابْذِكر احاديث .. صالح يَرِثْها منه
……………………………………..
(١)
بيت العباده مسموح .. يابِتْ اسد مو صَعْبه
الله كتبها باللوح .. حيدر وليد الكعبه
اشّر على امُّه اتروح .. صوب الجدار اتحبه
من قبَّلت بثّت روح .. بالمستجار اطِّلبه
من دِخْلت الكعبه اشْصار .. شافت حراير اخيار
ما قِدْرَن ايْقوموا اوقوف .. الا ابعلي ينْخنه
……………………………………..
(٢)
مريم ابْعيسى تِقْسِم .. كِنْت ابْمَحل عِبَاده
جاني امُر ومْحتم .. لا اتْخالِفي الإراده
بس مره بيتي اتْصَمّم .. فيه إِلْعلي وِلاده
تِنْزل ابْصوغه مريم .. لَمّن قَرَب ميلاده
نِزْلت معاها تِذْكار .. نَفْس الرُّطَب والأَثْمار
واتْقول بِيدي مَقْطوف .. مزْروع بس في الجنه
……………………………………..
(٣)
شمس الله خِجْلت مرتين .. الله كشَف برهانه
ابْمولده اتْوارَت زين .. فوق السحب خجلانه
يوم الّي فات العصرين .. ردّتْ اوْهِي نَدْمانه
اسْمَحْ لي يا بُو السبطين .. إنْتَ الفَلَك ميزانه
صارت تِعَدِد اعذار .. والقمر يِسْمع محتار
نوره يحَسِّب مَكْسوف .. جاه الخَبَر يِتْونّه
……………………………………..
(٤)
نحسب رجب بالترتيب .. للزمن اول مولد
لا قمر لا شمس اتنيب .. نوره علي بس يوقد
يصحى علي وتالي اتْغِيب .. يِنْحِسِب يوم انْعَدِد
والقمر لو يطلع عيب.. مطلوب منه يرقد
بُولادِتِه اتْشِع انوار .. واتْغَرد إلْهَا الاطيار
ساجد وبالكعبه اطُّوف .. حورْ اوْمَلَك والجِنّه
……………………………………..
(٥)
الكعبه ما كان اتْصِير .. لُوْ ما علي ابْهذا الكون
والأرض كانت تأجير .. امْوَثَقه وبالْقانون
بعد السعي والتقصير .. حجُّك ترا هو مرهون
حتى الصلاه والتكبير .. تُصْبُح الْحيدر مديون
يابا الحسن يَكَرار .. قاسِم الجَنّه والنار
بُولايتُك نِنْسى الخوف .. بِصْراطُك اتْوَصلنه
……………………………………..
(٦)
وِلْماي الله خلاه .. مَصْدر حياة الكونين
والحوض باسْمُك سمّاه .. والكوثر اهْيّه ام حسين
غديرك هَمْ فَهَمْناه .. إسْلامنا يِصْبَح دين
وابمولدك تِتْمنّاه .. تِزْرَع فَدَك رياحين
تِعْجَز قَصَايد واشْعار .. تُوصِف علي حامي الجار
والهوا عِدْنا مألوف .. ابْحيدر عشق نِتْغَنّه
……………………………………..
(٧)
وقت الوِلاده مِنْ حان .. ساجِد ايوَحِد الله
رافع اكفوفه ابإيمان .. بالكعبه ليه امصله
صُوته اينادي سُبحان .. والكون صار القبله
وَيّايَه افضل نِسوان .. ام الوليد اتْقِلِّه
طُلْعت بِهْ مِنْ نفْس الدار .. مولود مِثْلك ما صار
بِقْمَاطه ما ظل ملفوف .. يحمل فقار اتمنّه
……………………………………..
(٨)
حان الوقت والتبجيل .. بالكعبه واهيه تفخر
من جا الامر ياجبريل .. انزل ولا تتأخر
والحور تِحْمل اكْليل .. بحلى مسك تتبخر
بالمستجار اييد اتشيل .. مولود جوده يزخر
رُفْعَت الْحور الأسْتار .. بانْ الضَوا للأنظار
والكل سَمَع منّه احْروف .. الله علي امْعَلِّنّه
……………………………………..
ابو مصطفى ال يوسف
٣١ مارس ٢٠١٦
