………………………………….
هالديره تِضُم كل ناسها ابليل
من يشرق صُبُحْهَا يفرح إنْهَار
يقول الليل يامحلاها لنفاس
اجمعها ورد وجمعها ازهار
هالليل ابلسان الحال للناس
ديرتكم حُضُنْ والدار اسرار
قلت الها يديره لو تِسِمْحين
اسرارچ جميله وتصلح اخبار
قالت قول واكشف عنّي متريد
تِحَرّى بالنقل توصيل لفكار
داخل داركم تهت آنا ياناس
طلعت داركم اوسع من اديار
فيها الماي ينبع وسط لبيوت
يحيي للزرع والباقي انهار
فيها الطّير لمن راد يرتاح
لجله تنحني اغصان لشجار
تمشي بالطرق كل الرجاحيل
لكن عينها متلبسه استار
مشهد كنت اشوفه مره واعيد
نسوان ابخِدِر تخشاها لنظار
منظر شافته اعيوني من ابعيد
شفت شايب ضرير اوحوله لصغار
ظنيت ابفعلهم بس يأذوه
لقيت افعالهم من فعل لكبار
اثاري ابخدمته يتبادروا ابشوق
كل واحد جوابه يبدي بصرار
اذا لصغار عدهم هاذي لفعال
اظن يبذر ثمرهم بحلى لثمار
بعدها الديره ما تخلى من الخير
تزيد ابخيرها تتعدى لسوار
حواليها بحر من نسمته ايطيب
كل مهموم من يشكي له اضرار
والديره تِزِين ابكل عمل خير
كل واحد تشوفه ابوالده بار
من تغرب شمس تغرب بلنجوم
لأن ضي ديرتي يسطع بلاقمار
اشوف الديره كنها تتسع كون
قريبه امن السحب بس تبعد امتار
وِحْسِب كم وفيْ للديره موجود
ما نوفي لها لو قدِر معشار
في الديره طفل للناس مألوف
لو يسرح لِعب ما حوله اخطار
للديره مظاهر تشرح انفوس
للحشمه اثر والناس اخيار
كل شي تطلبه بالديره موجود
من قرص الخبز واللوز واكنار
مسقوفه ابسعف لبيوت والطين
من ذاك الوقت تنحاط بحضار
لبيوت انْبَنت لكن بلا سور
عيب اعلى الذي يبنيها بجدار
كلنا ابديرتي اهليه وانصير
يربطنا الوفا والجار للجار
عزيزه ديرتي ما ترضى بالضيم
ولا حتى بَرُضها تحضن اشرار
تتغنى النواخذ وسط لبحور
موال البحر مكتوب بشعار
تريد احچي وزيدك بالشعر بيت
ديره تكتب الموال بطوار
اذا دار الهوى لامس النخلات
غنّت بالسعف نغمات لوتار
لهجة ديرتي من بين لهجات
لكن تِنْعُرف وابشتى لقطار
هدير الماي نغمه تجذب الطير
طبيعي الماي ينبع منها لآبار
خيرات البحر نعمه اعلى لبيوت
تِرْسَتها سمچ بالغزل سكّار
لوما البحر كان الغيم عطشان
من ماي البحر تنزل الامطار
دشّات البحر ليها البحاحير
ما يوم ارْجَعَت من دون محّار
مابين البحر وابيوت للناس
مسرح للعب والهول تذكار
مثلچ ديرتي القاها في وين
ذرّه فاخره مثلچ فلا صار
سلام التعزفه بالنوته مكتوب
قصيده امسطره والوزن نصّار
صلاة ابديرتي مِتْمَيْزَه عالْكون
صلاة اعلى النبي وآله الاطهار
…………………………………..
ابو مصطفى ال يوسف
12 ذو القعدة 1439 هـ
25 يوليو 2018
