في حق ابا الفضل العباس عليه السلام
…………………………………..
نبض القلب دليلي
خبرني عن كفيلي
گلها يزينب كافلچ عالتربان
…………………………………..
(1)
من كربلا بدّى الخطر يتقرّب
حل البلا والجيش ماله مهرب
خلى حسامه امن الدما يتشرّب
سيف المنيه ابيمنته لمجرّب
ودعي اله حين ابحين .. تسلم لخويه الكفين
زلزلها واجنود الكفر بالبركان
…………………………………..
(2)
ضَيَّق عليهم كربلا ابحملاته
صارت جثثهم للفرس ممشاته
ظنّوه حيدر من عظم ضرباته
شبل الاسد نفس الابو زأراته
صوته عليهم كرعود .. كل من برز له ميعود
خزراته ترعب كل بطل بالميدان
…………………………………..
(3)
عدّى النهر عدّى الخطر وحدوده
شايل الجود وللخيم مقصوده
هم البطل يوصل الماي ابجوده
همِّه لمخيم والدرب مسدوده
للعلقمي لمن طاف .. درب الخيم ماينشاف
وقّف ابجوده ولفكر ظل حيران
…………………………………..
(4)
زينب اتحاتي والحذر وَجّلْها
تتأمَل ارجوع البطل كافلها
كثر الشدايد والمحَن تنحَلها
لاحت علايم والقدر يحملها
يبچي لحسين اعضيده .. وعلى لخصر حط اييده
من عاينت لحسين راجع وجعان
…………………………………..
(5)
شافت اخوها منكسر برجوعه
حست خطر من فرقته موجوعه
جاها ابخبر واحسين هل ادموعه
عباس جثه اعلى النهر مصروعه
بالماي من واعدكم .. همِّه يسايل عنكم
مفضوخ هامه اويسأل اعلى الرضعان
…………………………………..
(6)
بالحسره ابچي وابتدت احزاني
فقد الكفيل ابهالوقت أذّاني
ريتك يبو فاضل تشوف إشُجاني
درب السبي هذا الدهر وداني
ما چان هذا ابّالي .. درب السبي يالغالي
صك الكفاله ايصير بييد العدوان
…………………………………..
(7)
جيتك يخويه المشرعه واتحذّر
بسايلك لكن بشوف المنظر
عباس دنهض ليّه لا تتعذر
كل العطاشى جت الَك تتشكر
متريد منّك هالماي .. بس ترجع الها حمّاي
شكرن يراعي المشرعه يالعطشان
…………………………………..
(8)
عباس خويه بسألَك عالجيّه
نقطع أملنا لو بعد نتريّه
گلها العذر واتصبري يخيّه
حسره تصيري ابهالزمن مسبيّه
من تعرفين اظروفي .. عذري السهم وچفوفي
لچفوف لو عندي خذيتچ بحضان
…………………………………..
(9)
وامْشيت بدموع الحزن متأثره
يابو الفضل عن حالي والله ادرى
خويه الرباب الجيتك متنطره
حال الطفل عبد الله كلش خطرَه
محتاره ويش اقلْهَا .. لمن تجيني ابطفلها
واگليبه يلهب بالعطش كالنيران
…………………………………..
(10)
شنهو العذر لطفالي ويّا ابنيني
ردّي اليهم يختي واعذريني
وابحالهم لو نلتقي خبريني
لمن درَوْ سهم المنيه ابعيني
حال العطش ماهمهم .. رادوك ترجع يمهم
ذابت اقلوب الوالها بالاشجان
…………………………………..
(11)
صعبه يخويه لو شفت حالتهم
يم النهر لما اطلعَوْ مرّتْـهُم
طفله اوطفل لو تنظر الوقفتهم
تقرا الحزن والحسره من دمعتهم
عمنا يوسفه ماجيت .. نرجع يتامى للبيت
ليتك اتقوم اوترجع ابنا لوطان
…………………………………..
ابو مصطفى ال يوسف
22 ذو القعدة 1440 هـ
25 يوليو 2019
