……………………………….
واقع بالمقابر تجمع ابها الناس
واسم المقبره متسجّله ابتاروت
نفس النعش تِحْمَلْ بيه كل لموات
نفس الدرب نفس الحال والتابوت
عيل ليش التسابق بالكلام اهواش
وانردد الفُرقَه بالنغم والصوت
ديرتنا الجزيره من بحر والماي
وانخيل ابمزارع والنوادي ابيوت
تجمعنا النوادي وابلعب فنان
علمنا علم بالكوره فن الشوت
عزيزه الناس ما ترضى المذله انفوس
تتحدّى المخاطر في سبيل القوت
ديرتنا رسمها ابريشته الفنان
نحتها اعلى الرمل طرزها بالياقوت
تجمعنا ابسلامه روضة القرآن
تجمعنا المساجد والدعا بقنوت
تجمعنا الليالي والسمر بالليل
واليسهر له ساعه بالسهر منعوت
يجمعنا عرس كل احنا معزومين
ما بيها العزيمه لا ظرف لا اكروت
يا محلى جمعنا من نجي الخباز
خبزه اتقول چنِّه بالفرن بسكوت
يجمعنا النخل والثمر منها اشكال
ما يعدل ثمرها لا عنب لا توت
تجمعنا المجالس والحديث اسرار
والسر يبقى حاله بالضمير اسكوت
تجمعنا المحبه والوفا بخلاص
عنوان التسامح بالقلب منحوت
تجمعنا السفينه من ندش الغوص
اييد ابإييد نبحر ما يهمنا الحوت
مطلوقه المشاعر بِيْنّا ابلفراح
خلينا الكدر وقت الفرح مكبوت
نتواصل قبل كل بيت يعرف بيت
يفرح من وصِلْنا عالم الملكوت
دنيتنا صغيره والعمر مقدور
ميفيد الندم لو فات تالي الفوت
بخت اللي سكنها ديرة الطيبين
يا زين البخت يازين هالمبخوت
……………………………….
ابو مصطفى ال يوسف
21 شعبان 1439 هـ
7 مايو 2018
