في تكريم رؤساء نادي النور السابقين
…………………………………
سنابس يا سنابس يا سنابس
على موج البحر اسمچ تغنّى
حبات الرمل من ارضچ انصيغ
ذهب واحنا الذهب منّا تكنّى
كم كاس الذهب من فوز لبطال
كم قمة جبل بسمچ وصلنا
وصلنا من سواعد هاذي لرجال
ملاعب ديرتي تشهد حفلنا
لو نوصف عملكم ماله امثال
اتقنتو العمل والتم شملنا
نمشي احنا مثلكم بحلى خطوات
من يمشي خطا حلوه مثلنا
رسمتو السور وانتو اللي بنيتوه
واحنا بالرسم شفتوا عملنا
نجسد بالرسم بلوان للنور
من مثله الضوا لونه علمنا
شيدتو ابذهب اركان للنور
لان انتو الذهب واحنا انذهبنا
حبكم للبلد والعمل بخلاص
خليتو العمل يعمل مجدنا
سنابس بلده طيبه وانتو طيبين
قلبكم طاب من فرّح بلدنا
سنابس تنكتب بحروف لبطال
لولاكم ترى ما حد كتبنا
زمن كنتو ابموده الان عشتوه
مودتكم حبل يربط حبلنا
عشتو اسنين وانتو ابساحل النور
نفس اتراب ساحلكم تربنا
ما اقصدها كلمة سابق اتكون
لأنْ ليكم الى هاليوم رنّه
انتو هالأوائل وانتو للحين
من يسمع اسمكم هم تعنّى
خلوكم قُرُب لا تبعدو ابعيد
ترى الكل ابقربكم قَرَب منّا
صنفتو الوفا من بين لفنون
علمتو الرئاسه اليوم فنّه
ولحب كلمه تبني جنّه للناس
بنيتو للسنابس احلى جنّه
شكرا والله شكرا نخجل انقول
لو نقدر نوفي چان قلنا
……………………………………
ابو مصطفى ال يوسف
29 ربيع الثاني 1440 هـ
5 يناير 2018
