من الشعر الفكاهي الهادف اتمنى ان تحوز على بسمه من شفاهكم الطيبه.
تجليبه
…………………………………….
ناقد ولقصد تحملني محمل خير
نتسلى معاكم بحلى امسيّه
أكْتِب لي قصيده اوطولها مترين
يراجعها لدرازي ابطول يوميّه
اذا ناقص وزن والمعنى ما هو زين
اجزم ما يحط لك ميه من ميه
واتحط لي يبو يوسف خميله اورود
اثاري اورود ترسل لِيْ صناعيه
سهله وابلاش ايطير منها اللون
كل الوانها تشكيله مائيه
جاوب لو سألتك مشتلك من وين
ادري من ايموجي ابلمسه سحريه
( ايموجي ايكونات الوتساب)
ترى كل الورد ميت ولا يسقوه
موجوده ورا الكيبورد مرميه
حتى الوجِه يللي ترسله فرحان
ترى من تقلبه هالضحكه صوريه
اصلها مو حقيقي كلَّها لوجوه
تراها من رسم وابريشه صينيه
بالعاده اليقدم ورد من بستان
والورده ابغصن لنها طبيعيه
واحنا الورد لازم قبل ما نهديه
نكتب عالكرت هم جمله اسميه
إكتب كلمه لي بَقْبلها لو حرفين
حتى لو خطأ احروف الهجائيه
كلامي ينطبق هذا على الطيبين
وحَدْهم يعرفوا شعر الفكاهيه
قصيده تنكتب حتمن تصير اخطاء
يمكن بالخطا تحصل طباعيه
اذا مطلوب منّا ينقرا كم بيت
لابد ينوزن والوزنه شعريه
ترى الاشعار لوحه تنرسم بفكار
شرط واحد الشاعر عنده حريه
انقد والنقد يكسي القصيده ابلون
لحروف ابذهب واللوحه فضيه
…………………………………….
ابو مصطفى ال يوسف
9 جمادى الاول 1439هـ 26 يناير 2018
