في حق امير المؤمنين عليه السلام
الوزن تجليبه
…………………………………….
يمضي الوقت بينا واحنا مشتاقين
صعبه الشوق ليمن يبتدي صَمْته
ماعندي حروف اوصف معاني الشوق
كلام اللي اعرفه هم انا قلته
اه ابآه تاخذني حنين الناس
تاخذني فزع واتعوفني ابسكته
اشتاق الأذان اليرتفع بالصوت
وستانس ابصوته من يجي وقته
تهب ذيك الهبوب البارده والقيض
قوض بالحراره وابتدى لـشته
اجلس والقلب يتلهف الاوقات
كل وقت اليمر يا ليت انا امسكته
دنيا اشكد صغيره والوقت محسوب
يمضي اعلى الثواني يوم حسبته
ساعات الزمن مصنوعه فزاعات
من تقرب النايم رنها فزعته
هذا الحال يمضي لو نسينا ابيوم
لكن بالقراءه اتعود ذاكرته
لابد يوم ترحل والاهل تنعاك
لمن هالاجل يقرب ابراحلته
وين الناس وين اللي سَهَرت الليل
وياهم غدت نعشك امشيعته
تترحم عليك ابرحمه ذاك اليوم
تابوتك بيادي اتكون شايلته
نفسك رأفه بيها من عمل دنياك
تراها اعليك كلش عمل ضامنته
ترحل تبقى من دونك فقط لعمال
نفسك هالعمل لك يوم ذاخرته
امّاره النفس لكن بعدها اوياك
عن كل سوء ليتك عنها باعدته
خذ منها الدروس ابلا شرط واقرار
واحفظ كل درسها النفس دارسته
وابيوم القيامه اتروح للكرار
وانظر يم صراطه انچان عابرته
فايز لمن اجّاوِز صراط الدين
هذا الفوز يعني النفس جايزته
من تلقى علي بالكوثر اتوناه
علي ابصورة نهر والجنه من تحته
هذا اليوم يفرق كل عمل مكتوب
علي ابضربة الخندق عدل وازنته
اذا عندك ولايه صعبه منّه اجوز
لصعب من تجي ناكر غديره انته
وينك عن علي ما تقرا بالقران
نعمه اشلون دينك منها كملته
لا اتحدك نفِس والمرتضى بحروب
فقاره ابغمد واليمنى قابضته
سهله والله سهله يمنى بو الحسنين
من دون الفقار اسهل امصافحته
مو كيفك الجنه اتروح لو بالنار
واجب عالنفس لصراط طايفته
لأن تحت الصراط الناس مقسومين
ضربة حيدره ابفقار قاسمْتِه
ميفيدك تفر واطير بالجنحان
لو تعلى النجم ميدور دايرته
لا اتوديك نفسك للسما بنجوم
علي ايرد النجم والشمس شاهدته
لا اتصعب عليك الوقفه يوم الدين
ترى الدنيا علي لليوم حافظته
روح ارض النجف واطرق عليه الباب
لا ايكون اليقبل بابه زعلته
خلك معتقد لا اتغير التاريخ
تاريخك جليل ابشرط راجعته
علي ما يطلبك تنزع ثياب اسلام
لسلام ابضريحه اتكون لامسته
تالي خذ تراب امن النجف محفور
من روحك تشمه اتكون بايعته
…………………………………….
ابو مصطفى ال يوسف
13 صفر 1440 هـ
22 اكتوبر 2018
