في الشوق لزيارة امير المؤمنين
…………………………………….
كلمن ابصوته هتف
يمتى نرجع للنجف
…………………………………….
(1)
يوم جينا للنجف منها نسير
نقرا بوداع الزياره للامير
وختلط لوداع بالدمع الغزير
ننتظر بالشوگ بضفاف الغدير
كلمن ابصوته هتف
يمتى نرجع للنجف
…………………………………….
(2)
ركعتين انصلي وقت النافله
نسأل الله اوبالدعا نتوسله
بالوصي درب السلامه انوصله
سلَّم الله من رجعنا القافله
كلمن ابصوته هتف
يمتى نرجع للنجف
…………………………………….
(3)
زرت مولانا اوگلبي ما شبع
شوگه بنفاسي وابصدري انجمَع
صوت كل خطوه اخطيها انسمع
من اثر لقدام بالصحن انطبع
كلمن ابصوته هتف
يمتى نرجع للنجف
…………………………………….
(4)
ولأثر من جسمي خليته الشهود
متصل مولاي بعضاء السجود
وانطبع سباچك ابحد الخدود
بابك امسجل عليه اسمي اويعود
كلمن ابصوته هتف
يمتى نرجع للنجف
…………………………………….
(5)
بالصحن لنفاس تتوزع سوى
والصدر خليته مخزن للهوى
ذاب ويا الروح وفادي ارتوى
تحفه هالأنفاس هالتحفه دوى
كلمن ابصوته هتف
يمتى نرجع للنجف
…………………………………….
(6)
ما نعوف ازيارة النور المبين
للنجف نوصل إمام المتقين
والله لو يحصل نزوره اربعين
والزياره تنحسِب عن جنتين
كلمن ابصوته هتف
يمتى نرجع للنجف
…………………………………….
(7)
صورة القبه وراها اشگد صوّر
لنبيا وكل الرسل كل البشر
ولملايك تقرا يس السوّر
تبتهل تصعد سماها ولأثر
كلمن ابصوته هتف
يمتى نرجع للنجف
…………………………………….
ابو مصطفى ال يوسف
23 شعبان 1440 هـ
28 ابريل 2019
