مرثية في الفقيد السعيد الحاج زهير علي الراشد ابو احمد. رحمه الله بواسع رحمته.
…………………………………..
ياليل السنابس غاب منّچ نور
بالموت انطفى والضحكه شايلها
حسافه العمر ما خلى زهير ايطير
لطيور البحر لنّه يغازلها
حتى لو تعب ما يترك الضحكات
من وقت العصر يركض يجاملها
بدّل له العمر جنحان بييد الموت
خلانا ورحل والرحله سهلها
عادات القدر ما يحسب الويلات
ولساعة حزن لفراح عدّلها
قاسي يا دهر تاخذ حبيب الناس
كل مجلس يطبّه البسمه يشعلها
زهير الطيبه فيه اتذوب بالانفاس
والناس ابفطرته ابطيب عاملها
يتذكر محاسن كل هله الطيبين
كلمات الزعل عن روحه غافلها
هاذي سنة الارواح لما اتغيب
زهير ابروحته بعناق راح الها
شايل من حياته مفردات الموت
لنه بالعمل هالدنيا جاعلها
تملك لك رصيد ابكل عمل للخير
يا عطف اليتامى وانت عايلها
متهني رحت لنّك عرفت اتعيش
بعدك هالعمل بالدنيا كافلها
صوتك يصدح ابكرنيشنا يزهير
خطواتك نغم تعزف اراجلها
ياصدر الرحيب الما بقى زعلان
يا طيب النّفِس مايوم زعلها
تشكيك المواجع بالفراق احباب
وانت اللي ابد ما يوم شاكِلْها
خبرنا عن اللي زرتهم هاليوم
اكيد ابجيتك فرحانه لك كلها
عنّك صعبه نسأل جلسة الاحباب
تهمل منا دمعه من نسايلها
ما نقدر نسايل تخنق العبرات
صفحات الغياب الموت سجلها
نستذكر ايامك وانت عين السيف
روحك هالسعيده اويانا كم تلهى
نستذكر ايامك بين كل لبيوت
طيفك منرسم ببيوت داخلها
لكن خلّى لينا الموت كم اقبور
وحزان الاحبه ابدمع بللها
عفوا نعتذر عن دعوة الغيّات
لان الموت هاذي الغيبه طولها
…………………………………..
ابو مصطفى ال يوسف
11 ربيع الاول 1441 هـ
8 نوفمبر 2019
