………………………………………..
چنها المرتضى اچفوفه .. مِتْـرَكْبَه على العباس
تعرف كربلا باسه .. باسه ابحيدره ينقاس
………………………………………..
(1)
موضع الكفين يالرايح تزور
راسمه احدود الكفاله وِلْخدور
ضارِبه ابسيف المنيه اعلى النحور
طاعِنه ابرمح المسدد عالصدور
موصوف الاسد موصوف .. مشيِّه بالحرب مياس
تعرف كربلا باسه .. باسه ابحيدره ينقاس
………………………………………..
(2)
يوم عاشر شالت الماي المعين
ساقيه اقلوب العطاشى مرتين
كاتبه ابدم الشهاده كلمتين
كلمه خويه كلمة ادركني حسين
فاض النهر من جوده .. جوده ملّى بِه الفنطاس
تعرف كربلا باسه .. باسه ابحيدره ينقاس
………………………………………..
(3)
للچفوف اوصاف كلها امأكدَه
حامْلَه الرايه على درب الهدى
حامله الگربه ولا اتهاب العِدا
للشرب ماي الفرات اتمهده
سوّت بالفرات الويل .. حملاته على الحُرّاس
تعرف كربلا باسه .. باسه ابحيدره ينقاس
………………………………………..
(4)
كف يمينه اشلون قطعوها الفحل
لنّه عالگربه يعاينها البطل
همّه عالاطفال ظل يمضي ابعجل
صار باليسرى سلاحه اوما نزل
من قطعو له ايساره .. خيله اعلى المنيه داس
تعرف كربلا باسه .. باسه ابحيدره ينقاس
………………………………………..
(5)
هودج الحورا ولا لحظه يميل
لن ابو فاضل على المحمل كفيل
مو فقط عالسّيْف عالرمح الطويل
رسمت الكفين عالهودج دليل
بصمة چف ابو فاضل .. كتبت كربلا ابْكَرّاس
تعرف كربلا باسه .. باسه ابحيدره ينقاس
………………………………………..
(6)
اچفوف تسقي بالطفوف العايله
قدمت معنى الاخوه الفاضله
من عِشُقها قَبَّلَتْها كربله
والوفا اثيابه عليه امفصله
ثوبه امن الوفا منسوج.. من صغره البطل لبّاس
تعرف كربلا باسه .. باسه ابحيدره ينقاس
………………………………………..
(7)
يِمنَت العباس شال ابها الفرات
يسرته سدّت على الجيش الجهات
من علامات العباده الثابتات
سِجْدَت ابوقت المعارك للصلاة
تسجد قَبْله اچفوفه .. تالي تسجد الأنفاس
تعرف كربلا باسه .. باسه ابحيدره ينقاس
………………………………………..
(8)
سر قَطُعْها ابكربلا يبقى السؤال
شاهده ظلت على عظم القتال
دبّت ابوقت العطش ماي الزلال
مسكت اعلى الجود واتْصِد النبال
صابو بالسهم عينه .. تالي بالعمد عالراس
تعرف كربلا باسه .. باسه ابحيدره ينقاس
………………………………………..
(9)
ليها مشهد تنكشف يوم الحساب
فاطمة تفتح سجل تفتح كتاب
الله يأمر اقْرِي يازهرا المصاب
تقرا تسأل تنتظر تسمع جواب
تالي طلبت الباري .. يعلم بالطلب حسّاس
تعرف كربلا باسه .. باسه ابحيدره ينقاس
………………………………………..
(10)
لحظه بالمحشر علا الصوت الحزين
فاطمه سمعت الم وحده ابأنين
قرّبت سِألَتها علْمن تندبين
اه يحسين اصرخت ام البنين
واللي كدّر ام احسين .. قالت طيحت العباس
تعرف كربلا باسه .. باسه ابحيدره ينقاس
………………………………………..
ابو مصطفى ال يوسف
14 جمادى الثانية 1440 هـ
19 فبراير 2019
