في شوق المحب لزيارة الامام الحسين عليه السلام وكيف يرى بعينه تلك المشاهد المقدسة
……………………………………………
(1)
يَحْسين شِفْت ابْمشَهدَك زُوّار واتْزور
وَطْلِب من الله ازْيَارِتَك وابْيوم عاشور
بين المآذِن قُبّتُك والعَلَم مَنْشور
بابك يا سُلطان الخَلُق متْعَلّي لُقْصُور
يِمتى يَبَاب الله الفَرج ياخِذْ لُك الثار
(2)
وَمْشِي على دَرْب الصَّحِن واوْصَل مَقامَك
خَجْلان شُوفي ابْحَضرتك يِبدي احْترامَك
اوصَل وسَلِّم سَيدي وسْمَع سَلامَك
تُرفَعني لِلجنّه الزياره واهْتِمامَك
يا سيِّد الشُبّان بالجنّه والاحْرار
(3)
يِنْعُصُر قلبي مِن اشُوف الصُّوره بالناس
واشْتمَ عُطر فوّاح عنبر من هالانْفاس
وانْظر انْوار اوْجُوهُم وُحْجاب عَالرّاس
والمَشْيَّه مَسْعى بِينُك ومَابين عبّاس
قلبي يِطِير الْكَربلا ويِقْطَع الاسْفار
(4)
حُول المشاهد ناس جَتْ لُك بالطهاره
مابِين من يِقْرا الدعا ويِقْرا الزياره
مِنهُم يِرَتل مُصْحَف الباري ابْجَدارَه
كلهم اشُوف اعْيُونْهُم تِبكي ابْحَرَاره
حتى ابْسُجُود اعْضَائْهُم يِتْلُون لَذْكار
(5)
كل القُصور الفاخِرَه لِيها تَقَاليد
من تُوْصَل الناس المُبَجَّل تِنْحني ابْعِييد
وانت ابْمَقَامُك سيدي سباچَك الاييد
كِل الحَجِيج اتْبُوسها يا ابْن الاماجِيد
تِفْتَح مَضِيفُك وانت تِسْتَقْبِل الزُوَّار
(6)
تِقْصِد الناس ازْيارِتَك وابْقَلُب مَلهوف
طُول الزَّمَن ما تِنْقطع من ارُضْ لِطْفوف
كل المِلَل تِقْصُُد ضَرِيحَك تِسْعَى وُاطُّوف
تِدْعِي تَحِت قِبَّةْ النورا واتُرْفَع اچْفوف
واتْنادِي تَعْجيل الفَرَج واتْعِدْ لُك انْصَار
(7)
لِحْدْك يِشِعْ من نُور شِيبات الخَضِيبه
فُرسان للهيجا لِحِدْهم مَحْلى طِيِبِه
يَمُّك حبيب ايْنَام وِامْجَاوُر حَبيبِه
وامْخَيَّمَك يَحْسِين والتَلّه النّحِيبَه
كِلْهُم ابْجَنَّة كَرْبَلا وَمَحْلاها هالدّار
(8)
خُطْوَات اقْدَامُك طَبُعْهَا ابْوَسُطْ لُقْلُوب
واحْبابك اتزيد الخُطى وتِنْقُص لَهَا اذنوب
يِقْصِد الزاير من بُعُد يِقْطَع لُك ادْرُوب
يِمْشِي حَبِيبك للزياره ومهْجَتِه اتْذُوب
لِنِّه يشوف الجنّه تِدْنِي وتِبْعِد النّار
……………………………………………
ابو مصطفى ال يوسف
19 جمادى الثاني 1441 هـ
13 فبراير 2020
