………………………………….
يابو فاضل .. مو قلِت يمشكر آني امدلله
عالشريعه .. نايم اوتنخاك كل العايله
………………………………….
(1)
من بعدكم .. من يباري اظعونا لمن تشيل
يا بو فاضل .. مَحَّنَتْني غيبتك وانت الكفيل
من يداري .. محملي يابو الفضل لمن يميل
وانت تدري .. الغاضريه والدرب كلش طويل
عيني عميه اولقدر امشي
والدمع قطّعْ لي رمشي
يابو فاضل .. والطريق ابدون كافل مشكله
………………………………….
(2)
يا حبيبي .. طلعتك للماي بتجيبه اوترد
ولعطاشى .. عينها عالجود عنّه اوما تصِد
وانتظرنا .. عمنا متعودين ما يخلف وعِد
رد يعمنا .. كلنا نستقبل رجوعك بالورد
كلها من لطناب طلعت
عن رجوعك لنها سمعت
يابو فاضل .. ليتك اتشوف الشفايف ذابله
………………………………….
(3)
خاطر الْهُم .. منكسر وانت اللي ليهم تجبره
يحچو عنّك .. عمنا يالمعروف سبع القنطره
كل املهم .. مو صعب درب الْفُرات اويعبره
كل صورهم .. راسمين الجود محلى منظره
ولحُبر دمعة صبرهم
اتألمت حتى صُوّرهم
يا بو فاضل ..كل صورهم ماي جودك شايله
………………………………….
(4)
للحوايج .. باب للحاجات واحنا ابحاجته
مثل حيدر .. غيثنا بالماي بيدك غَرْفَته
لا تردنا .. اولا تقول الغيث غابت غيمته
هذا وقتك .. حان وقت العطش تطفي لهبته
ولفرج لازم له صاحب
والدعا لابد له راهب
يابو فاضل .. نهر جودك من دعانا توصَلِه
………………………………….
(5)
فرّحِتْنَا .. من سمعنا عمنا في وسط الفرات
وانكشف له.. ملّى جوده ردّت ابجوده الحياة
المّتْنَا .. غرف منّه اوْمَا وَصَل حتى الشفات
بس وصلنا .. احسين كلش مختنق بالعبرات
منحني وإييده اعلى ظهره
مختنق وابعينه عَبره
يابو فاضل .. حالك ابظهر الحسين امَّثَّلَه
………………………………….
(6)
رحنا صوبك .. عالنهر شفنا الچفوف امقطعه
تالي شفنا .. جودك ايْصُب بالفرات اويترعه
من فراته .. فاض نهر العلقمي عالمشرعه
وانت ظامي .. ما شربت الماي داخل منبعه
غمضت بالسهم عينك
والعمد فاضخ جبينك
يا بو فاضل ..صبر صدرك خلني عنك بحمله
………………………………….
(7)
كيف نرجع .. والرباب ابحاله مذهوله تصيح
كل املها .. يرتوي عبدالله تالي يستريح
من طلعنا .. واقفه ابعبدالله والسانه جريح
والله صعبه .. لو نخبرها من اييديها يطيح
وابْعُظُم هاذي المصيبه
والصبر من وين اجيبه
يا بو فاضل .. ليش قلب اختك يذوب ابكربلا
………………………………….
(8)
رجعي يختي .. واكتبي التاريخ اوّل صفحته
كتبي فيها .. بو الفضل لليوم رافع رايته
واجباتي .. للامام احسين واجب نصرته
تضحياتي..ما تساوي احسين بالطف وحدته
كتبي تاريخ الولاده
يوم عاشور الشهاده
يا بو فاضل .. نصرة المعصوم ليها منزله
………………………………….
(9)
لا تخافي .. سابع امحرم الشيعه تعرفه
ولمصابي .. عالمنابر من دمعها توصفه
ولأخوه .. اكتاب عنّي احسين هو امألفَه
يعرفوني .. شيعة المعصوم كل المعرفه
قوة الايمان فِهْمِه
حبّي للمعصوم نعمه
يا بو فاضل .. كل محرّم لك علامه الكامله
………………………………….
ابو مصطفى ال يوسف
22 ذو الحجة 1440 هـ
23 اغسطس 2019
