في وفاة الامام العسكري عليه السلام
……………………………………
صفره وجْنَات الحسن وشبيها
عمره خلّص حسبته يقضيها
……………………………………
(1)
سابع ابشهر الربيع الفاجعه
والألم جسم الامام ايصارعه
حاله تبچي والدموع ابمدمعه
ادموع للمهدي وبوه ايودعه
ايسلم الروح الامر باريها
……………………………………
(2)
وضُع كلش حول داره مضطرب
ولخصم عينه اعلى بابه تِنُّصُب
اتحيطها لنظار واتسد الدرب
يقترب للدار ولعسكر يِطب
اتريد للمهدي أثر تاليها
……………………………………
(3)
شيعته ابهاليوم ماخذها الوجل
عيشه ضنكه والوضع ما يحتمل
تدعي لله ايفرج الْهَم ابعجل
تنتظر يخرج اويعطيها الامل
اتعيش قرب المنتظر واليها
……………………………………
(4)
يا وسف اييد الغدر من سمّته
طالت الاسلام اييد الغدرته
شمس للعصمه تغيب ابروحته
امصاب للمهدي عظيم ابغيبته
واللي اعظم شيعته ايحاتيها
……………………………………
(5)
فرحت اقلوب التعادي المرتضى
اقلوب مقفولَه اشْتفيد الموعظه
عرفت المعصوم من سمَّه قضى
ضاق صدر الكون وظْلَمّ الفضى
شيعته ابدمعة حزن تجريها
……………………………………
(6)
غمّض المهدي ابحنانه اجفونك
بعد غسلك بالكفن لفونك
والملايك بالمشي ايشيعونك
شيعتك خلف الجنازه ايجونك
تبني لك قبه اومزارك بيها
……………………………………
(7)
ليش يا سامرّا انوارك طفن
اتغيب شمس العسكري المؤتمن
يبتدي دور الامام ابن الحسن
ايغيب عن لنظار مده امن الزمن
تنتظر له الشيعه من يلفيها
……………………………………
ابو مصطفى
6 ربيع الاول 1440 هـ
14 نوفمبر 2018
