في مسيرة السيدة زينب عليها السلام في درب السبي بعد العاشر من محرم ومقتل الاحبّه والاصحاب.
……………………………………
هالسفر يختي ترى اظروفه خطيره
تِرْجَعي ابدرب اليِسُر يختي اسيره
……………………………………
(1)
بالسبي طول السفر سَبَّه اوْمَذَلَّه
زينب اعلى الطاغيه تدعي وتِگِلَّه
يبقى خالد وَحْيِنا وما تِمحي ظِلَّه
عِدِل للقرآن والقربى محلِّه
والوحي ابهذا اليسر ويّا المسيره
……………………………………
(2)
يوم عاشر من بدت اعظم رِزيّه
صعدت ابصرختها تل الزينبيه
صرخه تدوي من اراضي الغاضريه
للحشر يُوصَل صداها للبريّه
تنسمِع يحسين يا شيخ العشيره
……………………………………
(3)
بالفصاحه والبلاغه حاججتهم
سدّت الكوفه ابخدرها اوْحاصرتهم
كِشْفت اقناع النواصب وَرْعَبَتهم
يا حسين ابصرخه نادت زلزلتهم
من بعدها الشيعه بالصرخه جديره
……………………………………
(4)
حسّبو ذل اليِسُر يقهرها واتموت
وابسبيها الطاهره مرّت على ابيوت
حُفْرت ابكل دار للطغيان تابوت
مرّه ونتها خفيه ومرَّه بالصوت
تندب المظلوم والدمعه غزيره
……………………………………
(5)
موكب ابدرب السبي سوّى العجايب
زينب ابصبر القلب شالت مصايب
ما انكسر من شدّة اهوال النوايب
وُرْثت الهيبه من اصلاب الاطايب
زينب ابدرب السبي تبقى الاميره
……………………………………
(6)
غاب سُرْ احْسين عنهم غاب امْرُه
قَـتْلُهُم لحسين ظنّوُ يِمْحِي ذكرُه
ما درَوْ كل الفلك يِضوي اعلى قَبْرُه
مَشْعَل الانوار عند زينب مقَّرُه
ودم وريد احسين انواره المُنيره
……………………………………
(7)
قزّمت زمرة اميّه من فِعِلها
كيف لو زينب معاها اللي كفَلْها
كان طابت روحها وطابت عللها
قضّت الايام من قرّب اجلها
سلّمت لحزان لِقلوب الكسيره
……………………………………
ابو مصطفى ال يوسف
17 ذو القعدة 1441 هـ
8 يوليو 2020
