في حال ليلى ام علي الاكبر عليهما السلام
…………………………………..
ليلى تنادي والقلب يتحسّر
شمعه وطَفَتها كربلا للأكبر
…………………………………..
(1)
وحي السِّما نزّل دعا ابترتيبه
ليلى للأكبر بالخيم تدعي به
واتوسلت لله ابذكر حبيبه
ياراد يوسف من بَعَد مغيبه
وابغربة المظلوم يرجع لكبر
…………………………………..
(2)
طَلْعَت اوليدي امن الخيم اذّتني
والدنيا وحشه اويا الغُرُب خلتني
درب السبي غصبن عليْ ودتني
واجروح منّه واشكثر راوتني
للباري امري واحتِسب وتصبر
…………………………………..
(3)
افراگك مصيبه وگلبي ما اتْحَمَّلْها
من تمشي كل خطوه الگلِب شايلها
بُرْباتك امُّك لو طِحت تِقتلها
لحظات عمرك ناظري امسجلها
لو غِبت عنّي لحظه يبني مقدر
…………………………………..
(4)
ليث المعارك حاضر ابحملاتك
والسيف چنّه المرتضى ابيمناتك
واتمثلت وقعة بدر صولاتك
فرّت عساكر هيبه من ضرباتك
شبل السُّبُط وارِث عَزِم من حيدر
…………………………………..
(5)
ضجّت اميّه الحال موت امحتم
برقابهم صوت الصقيل اتْرَنَم
وابحدِّه سيفك يا علي جهنم
شجعانهم صيد الحَرُب والمغنَم
عطشان وابقلبك لهب ظل يسعر
…………………………………..
(6)
يوم الحشر والزهرا وقت التشفع
تكشف غطى وانشوف مشهد يفجع
والزهرا يبني جت الك بالمصرع
ناحت على اجروح الجسد لمقطع
زاد الالم منها ابضِلع لمكسّر
…………………………………..
(7)
لمن طحت بالمعركه شفت احسين
يسرع وروحه تسبقه ابدرب البين
نادى ابعلي والكون ضج الصوبين
لكبر يروحي ومهجتي ونور العين
لحسين يمشي المصرعك واتعثر
…………………………………..
(8)
صورة المشهد من حسين اتعناك
مشهد يبچي المصطفى والاملاك
سمعت ابو الاكبر عفى الدنيا اهناك
ارواحنا اتنادي يبو اليمه افداك
من دمعة احسين الفلك يتفطّر
…………………………………..
(9)
واعلى المنابر ينقرا هالمشهد
واحسين يم لكبر ابطوله اتمدد
حط اييد تحت الراس إييد اعلى الخد
ضم الصدر ويّا الصدر واتنهد
چنها السما فوق الارُض تتكوّر
…………………………………..
ابو مصطفى ال يوسف
13 ذو الحجة 1441 هـ 3 اغسطس 2020
