حوارية بين السيدة حميدة بنت مسلم بن عقيل ابن ابى طالب عليهم السلام وخالها الامام الحسين عليه السلام.
……………………………………….
احسين خالي يا حبيبي ويا نظر عيني
مسلم اخباره بالكوفه عنها حَاچِّيني
……………………………………….
(1)
احسين خالي بسألك عن والدي وحالِه
اسمع ايقولون حوله التمت ارجالِه
واسمع البيعه اخذها وجاك مرسالِه
والكتاب الخطُّه بييدِه خلْني بقرا لِه
من كلامه ايطيب حالي يوم يلفيني
……………………………………….
(2)
احسين خالي اشلون بويه يوصف الكوفه
چان غير الخبر گللي اشلون موصوفه
بنظر احروف الرساله التوصف اظروفه
يبتسم مسلم يخالي ابرسمة احروفه
عطره بالمكتوب اشمّه ورَسْمِه يحييني
……………………………………….
(3)
احسين خالي احچي لي عنّه وين بات الليل
حوله اولاد الصحابه وتعرف التنزيل
حوله فرسان المعارك واسرجت له الخيل
حوله بالمسجد تسبح تلهج التهليل
عن وَصُف باقي المشاهد عنها عذريني
……………………………………….
(4)
احسين خالي شِفْت ابُويه بالحِلِم محتار
چنّه واقف عند غريبه وافتحَت له الدار
سألته في وين اهلُك هل دمِع مدرار
گلْها مسلم وابن عمّي خانته الاشرار
يبگي حالك يبو اليمّه وحاله يشجيني
……………………………………….
(5)
احسين خالي كنت اسايل بويه بحلامي
يمتى ترجع بالأماني وترجع ايّامي
من دموعه من شجونه زادت آلامي
وابفزع لذيابه حولي تنهش احرامي
طيفه كل لحظه يخالي يسرح ابعيني
……………………………………….
(6)
احسين خالي من دموعك تنزف امصيبه
روحي حسّت حال مسلم چنّه تدري به
واليِتِم لحظاته مُرّه وصعُب تجريبه
خاطري ياخال بييدك صار تطييبه
واليتم من صغر سني يتَّم اسنيني
……………………………………….
(7)
احسين خالي اشلون مسلم للقصر ودُّوه
گلها عند طوعه يصلّي وبالغدر خانوه
كل بيوت الكوفه صِعدَوْ بالحجر يِرْمُوه
شِهْرَوْ اسيوف الضلاله وبالحقد ضُربُوْه
يوم سيف الغدر صابه كان ايناديني
……………………………………….
(8)
احسين خالي طلبَه عندي وليت تقْبَلها
بالله هالكوفه بعيده اشلون اوصلها
بمسح اتراب اليضمه وروحه بسألها
بلْكت اتحن اعلى حالي من اقّبِلْها
كل دروب الكوفه صعبه خالي دليني
……………………………………….
ابو مصطفى ال يوسف
19 ذو الحجة 1441 هـ
9 أغسطس 2020
