في حق عبد الله الرضيع عليه السلام
يوليدي بشفافك رَسِم .. منصاب نحرك مبتسم
ترسمها زفراتك
……………………………………………….
(1)
من راح راعي النور والهيبه
مهدك اتقللي اشلون ترتيبه
صعبه عليه ابدونك الغيبه
يصاحب الضحكات والطيبه
سالم تجيني ونتظر .. من غيبتك آنا احتضُر
ورقُبها جيّاتَك
……………………………………………….
(2)
مهدك ينور العين هزّيته
شلته اعلى صدري اوياك ضميته
ونفاس صدرك طيب شميته
بالمهد طيب الجنّه من ريته
المن اهز آنا المهد .. ولمن دليلو يالولد
وابصوت نغماتك
……………………………………………….
(3)
صرت اسأل الوالي على اسكوتك
شابح ابعينك مختفي صوتك
رافع اچفوفك للسما اقنوتك
مهدك نظَرْتِه چنِّه تابوتك
قلبي وقف فكري اندهش .. ساكت ولا تشكي العطش
قاتلني بسكاتك
……………………………………………….
(4)
قلبي خفق لحسين من ودّاك
عطشان يبني والسهم روّاك
وحتار عسكر بن سعد بدماك
لحسين خَذْها اولسما علّاك
مانزل دمك للثرى .. وَجْنات لك متغيره
مخضوبه وجناتك
……………………………………………….
(5)
عمرك قصير اوصار تكليفك
حيفك رضيع ابكربلا حيفك
يوم الشهاده اكتمل تشريفك
وآنا ابخيالي مرتسم طيفك
واشگد امن ايامك مضت.. كنت احسب الها ونقضت
محسوبه برباتك
……………………………………………….
(6)
الموت وقّف لحظة اصياحك
والموت لمن وصّل ابساحك
دم النحر من تمسحه ابراحك
خايف ابقربك يسمع اجراحك
فتت اقليبي منظرَك .. دمك نزف من منحرك
نزفك على اقماطك
……………………………………………….
(7)
دم اعلى نحرك غِسْلَتِه ادموعي
كل قطره سالت طفّت اشموعي
نزلتنا بالطفت حنّت اضلوعي
ليتك اتشاهد يُمَّه لطلوعي
اطلع وعوفك عالثرى .. والملتقى بالآخره
ويايه عماتك
……………………………………………….
(8)
عمره صغير وبالشهر ينقاس
من غَيَّر البسمه وَخَذْ لنفاس
ياناس عبدالله انقتل ياناس
نال الشهاده وآني رَفْعَة راس
ادعي يوليدي بالإسم .. من حرمله ربي انتقِم
مقبوله دعواتك
…………………………………….
ابو مصطفى
1 ذو الحجة 1439 هـ
12 اغسطس 2018
