………………………………………
دمعته من تنهمر .. توصل اليوم الحشر
كربلا ابيوم الحشر تلفيها
………………………………………
(1)
سجدة السجاد غابت واختفت
والدموع التنهمر له اتوقفت
كربلا ويا المصايب له ازلفت
حزنه والدمعات عالوجنه اولفت
دمعته من تنهمر .. عالوجن تصبح جمر
من يِطَفّي هالجمر تاليها
………………………………………
(2)
من يجي عاشور واهلاله استهل
صار يبچي احسين بالسيف انقتل
يذكر الكوفه اودفن باقي الاهل
من كثر لدموع ادماها المقل
دمعته من تنهمر .. ينْقَضي منّه العمر
والعمر دمعات بس يجريها
………………………………………
(3)
ظل علي السجاد يكتب قصته
عالجفن يكتبها حبره ابدمعته
صارت الاحزان تسجد سجدته
والعباده اتهاب طوله اوقفته
دمعته من تنهمر .. بالعباده يحتظر
قصته وسط الدعا يرويها
………………………………………
(4)
وابشرب للماي ما يوم انشرح
قبل شربه يملي من دمعه القدح
ظل يردد بالظما قلبه انجرح
والدي لحسين عطشان انذبح
دمعته من تنهمر .. يذكر احسين الطهر
مات واطفاله العطش ظاميها
………………………………………
(5)
من رجع من كربلا لرض الوطن
من نَزِف لدموع جافاه الوسن
والمدينه اصبحت ارض المحن
وبشهر لمحرم اسنينه انگضن
دمعته من تنهمر .. تنزل ابلحد القبر
والبقيع الحزن خيم بيها
………………………………………
(6)
اه يسلطان المدينه اشغيبك
بچّت الباقر اجروح ابمنكبك
وَصْعب امن السوط گِل لِي اشعذبك
يبچي صبرك ولعباده تندبك
دمعته من تنهمر .. ثفنته تحچي الصبر
والصبر يبن النبي يحييها
………………………………………
(7)
من نروح انزور قبرك وينه
لمست السباچ منها اعفينا
من نسلم نرفع احنا ايدينا
ندري تسمع هم ترد اعلينا
دمعته من تنهمر .. اتصير للشيعه ذخُر
يم ضريحك يالولي اتلاقيها
………………………………………
ابو مصطفى ال يوسف
25 محرم 1440 هـ
5 اكتوبر 2018
………………………………………
