قصيدة شاعرية عاطفية تعبر عن حنان الامومة.
حـط قـلبك على اقليبي يروحي ونام
خـلـيت الـمـهد قـلـبي يُـضُـخ احــلام
يـنـعشني سـهـر وجـنـاتك الــوردات
ويـنـعـشني لِـمـناغى ولَـمـسة الابـهـام
اشـوف النظره منّك فيها دنيا الكون
واشـوفك بالنظر تتلالى وسط اجرام
تـسـبقني الــك روحـي بـلا خـطوات
اوصَـل لـك شغف والقاها هِيْ قدّام
مــا عـندي وصُـف يـوليدي لـلعشاق
مـن انْسِب حَجِم حبّك الى الاحجام
سُـرْ اشْـكد عجيب وما قدرت اخفيه
حِـسُّـك يِـنـكتِب مـن تِـسمعه الاقـلام
خـبّيت الـكتُب عـن كل غناوي اوياك
خـايـف تِـنْـكتِب مــن شِـفِّـتُك لـنـغام
واتـمـنـيت ارســـم صــوتـك ابـألـوان
لــون الـصـوت حـيّـر ريـشة الـرسام
ادعـي بالصلاة اعلى النبي لك دوم
وابـرفـعـة يـديـنـك لـلـصـلاة احـــرام
امـشي مـن امُـرْ يـم مـهدك اتوانيت
اوقـــف واسْـتَـمِـع تـنـهـيدك الــرنّـام
عندي لك اثر وامن الرضاعه اشهود
مـسـكه مـن چفـوفك لـحظة الإفـطام
كـل رمشه ابحياتي لك نقِش موجود
فَـهْـرَسْـت الـعـمـر واتـقـادمـت لــيـام
انـفاسك دوى لجروحي تِحمل شوق
يـجـري ابـكـل نـفـس ويـرطـب الالام
يلهمني النّدى اليحمل رحيق اشفاك
يــا طـيـب الـنـداوه وطـيب هـالإلهام
_________________________
محمد ال يوسف
9 ربيع الثاني 1444 هـ
3 نوفمبر 2022
