في حق القاسم ابن الحسن عليهما السلام
…………………………………………
رمله تون عالجاسم اوتتحسر
وتنادي صفو العيش يبني اتكدَّر
…………………………………………
(1)
جاسم الرمله اتعنى عد خيمتها
متبسمه من شافها ابوقفتها
قامت اضّمّه اوبلحضن ساعتها
قبّل ايديها واييده هم شمتها
واعيونها اعلى القاسم .. اتقلَّه يريحة هاشم
وجهك اهلال اعلى الخيم يمشكر
…………………………………………
(2)
جاسم نزل واعيونه تنظر ليها
لمّن نزل قبّل ظهر رجليها
قلْها ييمَّه اودمعته يجريها
انفاس صدرچ يمّه مدري اشبيها
من صدرچ لامس صدري .. حسيت قلبچ عمري
يمه اعلى صدرچ هالقلب يتأثر
…………………………………………
(3)
لمن دخل بالخيمه شع ابنوره
رمله اطلعت وابشوفته مسروره
جاها ابعجل والطِلْبه هم مخطوره
عمّي يريد احمي ييمّه اخدوره
عُرفت جواب ايريده .. حطّت قلبها بييده
بعدك يجاسم دنيتي تتغير
…………………………………………
(4)
بوداعت الله نادته ييمّه
صارت ابلهفه تلثمه واضمّه
تمسح على راسه وابهيده اتشمّه
تعطيه رخصه للحرب وتْحَشمه
وين التگي بچ گلْها .. لمن مشى يسألها
سمعت سؤاله اوجاوبت بالمحشر
…………………………………………
(5)
لمن مشى تالي اتبعت خطواته
وياها تمشي بالدرب عمّاته
من شافه عمِّه احسين هل عبراته
ردّه السبط لكن نشد نشداته
قولي له يِرخَصْني امَّاه .. عمّي الحنون اترجاه
رخصه ابوصية والدي وَتْشَكر
…………………………………………
(6)
جاسم اخلاقه امن الحسن نفس الطين
يحچي ابأدب لمن اجا العمِّه احسين
يدري ابوصية والده لمّا اتحين
يطلب الرخصه اومقصده يحمي الدين
لحسين هل دمعاته .. جاسم فهم معناته
شبل الحسن من شال قلبه اتفطر
…………………………………………
(7)
عمر الورد برباتعش ما كنّه
خاض الحرُب وابسيفه ظل يتغنّى
ياويله من يقرب اله اويدنّى
من خوفها الابطال تهرب منّه
واتهاب من ضرباته .. تهرب من املاقاته
خلاها مطروحه ابترب تتعفر
…………………………………………
(8)
رمله تسولف قصته اوترويها
وشلون جاسم من طلع تاليها
صار ابوداعه دمعته يجريها
وابفرقته اضلوع الصدر يحنيها
من قال لي وديعيني .. بان الحزن من عيني
ولعمر من دونك يوليدي يِقْصَر
…………………………………………
(9)
جلست تحاچي ابروحها بين الدور
وين الگى مثلك يلولد يلمبرور
ياللي الگلب كان ابوجودك مسرور
ياللي كِنِت ليّه الهوى ويّا النور
خيمه انطفت شمعتها .. راحت بعد زهوتها
والروح بعدك ترحل اوتتيسر
…………………………………………
(10)
لفراگ تچوي بالقلب حسراته
عمرك حسبته اوضاع كل حسباته
ذبلت ابموتك هالعمر ورداته
تحت الترب متوسده وجناته
عنك خَذوني قوه .. قلبي ابجمر يتلوه
درب اليسر خلّى القلب يتمرمر
…………………………………………
ابو مصطفى ال يوسف
30 شعبان 1440 هـ
5 مايو 2019
