قصيدة بَشَّرْنا بالْجِيَّه

في ذكرى استشهاد الامام موسى الكاظم عليه السلام.

…………………………………………….

دعوتنا لله ابحضرتك قريبه

باب الحوايج زايرك تِجِيبه

…………………………………………….

(1)

قومو يشيعه استقبلو العالِم

جانا الخبر مروي عن الكاظم

اليوم يطلع عالجسر سالم

صلَّى صلاة القايم الصايم

موكب وصل بحزان .. يِتْقدمه السجّان

خَلْفِه نَعِش واجنازته غريبه

…………………………………………….

(2)

تمشي الجنازه ما لَها امشيعين

فوق النعش هالشايلينه امنين

ميت ولاحد غمض العينين

وصفاد بيده امقيد الرجلين

فوق الجسر مطروح .. والجسد كله اجروح

مغدور بالسم يعترف طبيبه

…………………………………………….

(3)

مطروح والسم مختلط بدماه

ميت غريب ولا احد ويَّاه

لا باكيه ولا ناعيه تنعاه

ماحد لطم خدّه على فرگاه

واجْنَازَته اشْفِيها .. يِتْشَمَّتُو اعليها

يا ليت هاشم يِحْضُرُو المصيبه

…………………………………………….

(4)

ودّع حياته ونام بجروحه

للباري فاضت واعتلت روحه

والدنيا ظلمت والسما اتنوحه

فعلة السندي اليوم مفضوحه

من أمُر هارونه .. عذبها بسجونه

روح الامام الطيِّبه النجيبه

…………………………………………….

(5)

والشيعه جت بغداد ملهوفه

عند الرصافه الناس مصفوفه

والكل يِسايل يمتى بنشوفه

طَلَّة الكاظم ليها معروفه

من يِقْبِل المهيوب .. تِفْرح ابْجَيْتِه اقلوب

وقفتها من فوق الجسر عصيبه

…………………………………………….

(6)

من جى الطبيب وشاف احواله

يِسأل عَنْ اهله ابْدَمْعه همّاله

مسموم موسى وأكَّدْ اقواله

طِلْبُو ابدمه اوخَبُّرُو اعياله

ياللي تِشَيعونه .. غمضوها له اعيونه

والسم وصلها واصبحت شحيبه

…………………………………………….

(7)

والكل سمع وازدادت اللمَّه

جاه الرضا وابصدره من ضمَّه

نادى يابويه بالقلب همَّه

هارون عالكاظم نفث سمِّه

لملاك متأذين .. غابت شَمِس للدَّين

كلها وسافه حزنت ابمغيبه

…………………………………………….

(8)

صار الوعد فوق الجسر جينا

نترقبك تطلع يا والينا

واليوم نَعْشُك فوق ايادينا

حسره يالكاظم والله ظلينا

بَشَّرَنا بالجَيَّه .. واقليبنا اتْهَيَّا

من بعد هالفرحه الكدر نصيبه

…………………………………………….

ابو مصطفى ال يوسف

 9 رحب 1441 هـ

4  مارس 2020