في وفاة الامام موسى الكاظم عليه السلام
………………………………………….
وُلْمُصيبه ابْغداد .. يا كريم الاجداد
………………………………………….
(1)
يا امام الكاظم احنا .. اليوم من طلابك
من نجيك الكاظميه .. قوم وُفْتح بابك
جنّه نرفعها بيدينا .. من نشِم اترابك
يا كريم الاييد مِدها .. صافح ابها احبابك
ضيف محتاج الزّاد .. يا كريم الاجداد
………………………………………….
(2)
تهمل الدمعه الغزيره.. شيعتك مشتاگه
تنظر القبه الشريفه .. بالذهب برّاگه
تنشدك لحباب تسأل .. يمتى بك تتلاگه
ياغريب الكاظميّه .. غربتك حرّاگه
غربه تحرق لُفّاد .. يا كريم الاجداد
………………………………………….
(3)
ليش طامورة السندي .. طال بيها اسجودك
جَيِّتك فيها السلامه .. لو بعدها اگيودك
نجلس ابجسر الرصافه .. ننتظرها اوعودك
ولأمل ياخذنا ساعه .. ولأمل بوجودك
يمتى يحصل لمراد .. يا كريم الاجداد
………………………………………….
(4)
يا كليم السجده نورك .. سجدتك دلاها
من تصلي الليل توقف .. خلفك امصلاها
سجدتك فوق المآذن.. صوتك اتعلّاها
غيرك السجده الطويله .. ما احد سوّاها
يا شبيه السجاد .. يا كريم الاجداد
………………………………………….
(5)
رادَوْ يختبرون دينك .. جاهِلين أركانه
لَبّسوها الدنيا زُخْرُف .. للبغي نشوانه
سكّنوها اجوار جودك .. وصبحت خجلانه
زارتك للدنيا رادت .. واطلعت ندمانه
هذا بس للزهاد .. يا كريم الاجداد
………………………………………….
(6)
كاظم الغيظ المعاني .. من لغيرك صارت
والصبر منّك تِعذّر .. والظُلامه احتارت
ظنّوُ بالطاموره ظلمه .. ولقداسه انهارت
لكن المحراب يضوي .. يوم شمسك دارت
وابمدارك تنعاد .. يا كريم الاجداد
………………………………………….
(7)
يوم كل الناس جت لك .. طَلْعَتُك تِرجِيها
شافت اجنازه صغيره .. اربعه اتباريها
قلنا من هو الحاملينه .. وانكشف تاليها
جثه فوق النعش تضوي .. والسلاسل بيها
ليش نعشك بصفاد .. يا كريم الاجداد
………………………………………….
ابو مصطفى ال يوسف
22 رجب 1440 هـ
29 مارس 2019
