في حق يوم الدفن لشهداء الطف
………………………………………
هالرّوحه چنها .. لَهْلُك دفنها
بهداي ياعمه الترب لمن تهيلون
………………………………………
(1)
خبرني يا عمّه عن اخواني ادفنتهم
وشحال لجساد اللي عالغبره عفتهم
يا نور عيني اشلون بالماي اغسلتهم
منهو اللي عانك باللحد من نزلتهم
قلْها يعمّه .. صعبه المهمّه
لجساد بين امهشمه اومابين مطعون
………………………………………
(2)
قلها يعمه دسمعي بحچي لچ الحال
اللي جرى يا عمتي يشبه الزلزال
ومغطّيه الاجساد يا عمّه بلرمال
فوق الجثث حافر اظن آثار خيّال
من قربتهم .. عيني بچتهم
منظر جثثهم عمتي كلهم يِبَچُّون
………………………………………
(3)
تتحملي يم الخدر اوصف لچ احسين
اثْنَعْشر جرح فوق النحر ياللي تسألين
سيف الشمر يم الولي وامثلث البين
وابن الحتوف احجارته لكن بلا اجبين
والراس شالوه .. بالرمح رفعوه
راسه على راس الرمح ينظر به الكون
………………………………………
(4)
عالنهر عمّه كافلچ مفضوخ هامه
وابعينه ناشب له سهم طايح حسامه
لچفوف ماهي ابكربلا اوتارك علامه
شالتهم امّچ فاطمه اليوم القيامه
اچفوفه عطاها .. امّج تراها
طلبتهم الزهرا وُلِيها قال ممنون
………………………………………
(5)
انشدني عن جاسم اولكبر ياحبيبي
عن شوفت الشبان غيبني نصيبي
يعمَّه لو طِلبُوچ طِلْبه وِشْتجيبي
عنا يعمه ابكربلا لا لا تغيبي
ياليت يمهم .. لمن اضمهم
لو غبت عنهم بعتذر لنهم يعذرون
………………………………………
(6)
لنصار نومه اعلى الترب ما چنهم اموات
چنها الارايك من تحتهم هالمنامات
واللي يزور احسين ينظر هالكرامات
بلحودهم جنه تحتها يجري لفرات
لنِّي ابدفنهم .. چنت ابحُفَرْهم
شميت تربتهم عطر للجنه يمشون
………………………………………
(7)
وحسين عانق بالنحر هَمْ نَحُر طفلِه
چنهم على موعد سفر لِلجنَّه رَحْلِه
واتحقق المطلوب يازينب محلِّه
دم النحر يجري سوى للدين ظلِّه
هذا هدفنا .. للي عَرَفْنا
نهضة احسين ابكربلا ولوقت موزون
………………………………………
(8)
يا نور عيني كم قبر شقيت لحده
منهو اللي عانك عالدفن ولحاله شِدّه
گـلْها اوادم بالدمع نشدوني نشده
للقُرْبي مدمعهم يهل يخفوا الموده
لمّا اعرفوني .. كلهم بچوني
احنا قبيله من اسد بمرك يدفنون
………………………………………
ابو مصطفى ال يوسف
7 محرم 1440 هـ
17 سبتمبر 2018
