في وفاة النبي المصطفى صلى الله عليه وآله.
………………………………………….
بويه من يجي بيتي .. اسمع چلمت ابنيتي
نفسي اطّيب من اسمع كلامه
………………………………………….
(1)
يازهرا يا بنت النبي .. يهبط ملك عند بابچ
يستأذن ايريد النبي .. ونتي ابستر بحجابچ
بابچ اذا ما تفتحي .. متخطي رجله اعتابچ
هالمره ما عنده وحي .. نازل خبر لمصابچ
يهبط ونتي تحچي له .. طه بالشفى ادعي له
وانشد دعوتك فال السلامه
………………………………………….
(2)
جبريل ويّاه الملك .. بالدار من يلفوني
يا فاطمه عندهم خبر .. امر العلي يقروني
بالدنيا ما ليّه مقر.. بالآخره ايخَيْروني
جبريل يحمل لچ خبر .. سمعي ينور اعيوني
يبنتي من تودعيني .. اوّل من تلحقيني
تبچي اعليچ يا زهرا الإمامه
………………………………………….
(3)
من بعد موتي اتْحَمّلي .. غصب الفدك ولبيعه
لصحاب تصدر لچ امر .. تطلب فدك ترجيعه
ولآيه تِسْتَبْدَل حُكم .. ينفي الإرث تشريعه
أمْر الولايه مكتمل .. بالشُورى ضاعت ضيعه
للمسجد تِقِصْديهم .. يصدر أمُر واليهم
ما يرجع فدك اول مهامه
………………………………………….
(4)
زاد الوجع عالمصطفى .. للموت مد رجلينه
راسه ابحضن المرتضى .. يمسح عرق بجبينه
أنّاته سكتت والنظر .. اسدل عليه جفنينه
والروح مرت بالنَّفَس .. حسها علي بيدينه
نادى والدمع ساجم .. منّه اتودعي فاطم
وابچي اعْلى المظلل بالغمامه
………………………………………….
(5)
يذرف دموعه المرتضى .. منّه اعتلت وناته
لفلاك من دمعه امتلت .. لمّن سكب عبراته
جبريل وقّف بالسما .. لنّه سمع زفراته
وابسرعه يم حيدر نزل .. يمسح على دمعاته
صد للمرتضى بالهون .. دمعك ما يِحِمْلِه الكون
الكون الدمْعِتَك يوقف نظامه
………………………………………….
(6)
صدر الوصي ظل مختنق .. عند الغسل من شافه
يسكب الماي اوترتجف .. حيدر جميع اطرافه
عند الكفن ظل ينتحب .. من لفه فوق اكتافه
يمِّه الوديعه اتودعه .. تنظر جمال اوصافه
سمعها ابونه محزونه .. حيدر فاضت اعيونه
منِّه خاليه مكه وتهامه
………………………………………….
(7)
لمن حفر حيدر لحد .. ترب اللحد من شاله
من يرفعه ماله اثر .. بالقدره الله زاله
لحد النبي ماحده حد .. جنّات عد امثاله
ارض المدينه ابها القبر .. غيرچ فخر من ناله
برضچ تفتخر لملاك .. بقعه وُلْحجم افلاك
بيچ المندفن حلو الجهامه
………………………………………….
ابو مصطفى ال يوسف
25 محرم 1439 هـ
15 اكتوبر 2017
