حال السيدة الزهراء عليها السلام وكأنها تشكي حالها لابوها المصطفى صلى الله عليه واله وتبث آلامها لامير المؤمنين عليه السلام
الوزن فائزي
…………………………………………
ترحل الزهرا ولحزن عم السماوات
والدين يتنهد حزن والكون زفرات
…………………………………………
(1)
يابوي عنوه اتعمدو داري ادخلوها
بالدار زينب تنتحب من روعوها
بنتك يبويه اباب واجدار اعصروها
وضلاع صدري امن العصر قوّه اكسروها
محسن على وجه الارض من طيحته مات
…………………………………………
(2)
بيت المعالي والفخر بالطهر منعوت
جار الزمن واختار بيتي دون لبيوت
من جوره اتعدى على بابي الطاغوت
يصرخ ابآل المصطفى منّه اعتلى الصوت
لحرق الدار ابلا رحم وعتلت صرخات
…………………………………………
(3)
بنهار يا حيدر علي لا تدفنوني
اخُّرني وسط الليل تالي شيعوني
واللي اكسرو ضلعي وعالعين الطموني
وقت الدفن يا مرتضى لا يحضروني
ولقبر تخفيه ابقبر واخفي العلامات
…………………………………………
(4)
والدار من تطلعني منها قفُّلوها
يمكن يِرِدُّوا وِبْجَزِلْهُم يشعلوها
وللي اغصبو حقي غَصُب غيري عطوها
ولمحتمل واضح فدكنا يُوْرِثوها
حالك يحيدر شيّد ابهالقلب حسرات
…………………………………………
(5)
من يوم راح المصطفى راحت الاحلام
وليوم من عمري انكتب آخَر إلأيام
وتغمُّض اعيوني جفنها وتبقى لالام
تسهر اعيون المرتضى وللي اعتدى نام
لكنها تصحى ابيوم والأمه انقسامات
…………………………………………
(6)
وابساعة التوديع ظلت تمسح اجروح
والعالم العلوي ابنظر للزهرا مشبوح
شافو ابعالمهم علي صاعد مع الروح
ساعه اختنق كل الملا من سمعته اينوح
هيهات كلها اتصيح ننسى الزهرا هيهات
…………………………………………
(7)
من يوم شقّيت اللحد هالصبر من وين
دَخْلَت الزهرا للقبر هزّت الكونين
لملاك بچاها دمع حزنك يبو احسين
لولا صبر قلبك يحيدر عميت العين
والناس ببيوت المدينه ليها ونات
…………………………………………
ابو مصطفى
12 جمادى الاولى 1440 هـ
18 يناير 2019
