……………………………..
سورة الإسراء بالذكر الحكيم
ورد ذكر الروح ولْيسأل نشد
جاوب امْر الروح عند الله يصير
وبالعلم قِلّـه الذي أُوتي بعد
انت شايف اثر للروح ابمكان
بعد مَلْك الموت ماخَذْها اوصعد
علي من يوقف ابميدان الحروب
اتشوفه شاخص وليبارز له شهد
علي من يِمْسك ابْيَمناه الفَقَار
يبتدي الفَقّار وي جسمه اتحد
علي من يرفع فَقَاره للسما
يختفي الكرار ما چنّه انرصد
من يِسِل فقّاره لا واحد يراه
انت شايف روح تِنْسَل من جسد
ادري إلْآن اعْرَفت سُرّه العظيم
مو شطر مرحب شطر حتى اللحَد
هاذي ما حد شافها غير الرسول
حتى مرحب ما درى جسمه جَمَد
تالي باقي القوم حسّت بالشّداد
اييدها اعلى الروس تصرَخ يا مدد
من طرح مرحب وجسمه فلقتين
جاه لـِمْنادي يحيدر لا فند
رِد فَقَارك للغمد حتى تِطِيب
هالبشر يرجع عقلها والرّشَد
علي امْفَصْلِنّه الخالق عالصلاه
والصّلاه كفنها حيدر من سَجَد
علي يِفْرُح كِل مُحِب وقت الرخاء
يجلي هم لكروب في وقت الشِدَد
علي كوكب تتبعه كل الدروب
كل مجَرّه من شعاعه تِنْوقَد
لو يدور ابأي مدار اعلى الوجود
يبقى للأكوان محور للأبد
علي تخضع له اذاً كل البحار
جَزِر إنْ كان الوضع لو ليها مد
تدري ليش الشمس ردت له ابصلاه
لنها تاهت بعد ما حيدر هجد
ما اريد ابقولي غافي ابلا سجود
لنّه ذاك الوقت ذايب ما له عد
علي من ينظر يشع كل الوجود
والوجود اظلم وقت صابه رمد
وانت مثلي تعرف اشلون العليل
من تجيه العله يطلب له ضَمَد
حيدر المعلول هم طه الطبيب
والطبيب امن الله اصلا معتمد
……………………………..
ابو مصطفى ال يوسف
23 مارس 2017
