بمناسبة اسبوع البيئة الذي يحتضنه نادي النور بسنابس بالشراكة مع مكتب مدير عام وزارة البيئة والمياه والزراعة بمحافظة القطيف.
تجليبه
……………………………………………..
يسايل عن خبر لنجوم ليش اتغيب
ما تظهر تراها اليوم بسمانا
جوابك بيئة الانسان فيها اشموع
نور امن السنابس يشعل اضوانا
بيئة للزراعه والمزن كالغيث
تنزل تروي لينا اليوم ريحانه
سبعه ايام بيئتنا تهل كل عام
نادي النور باحه اتصير عنوانه
من صغري وعرفچ بالمطر تزهين
ارضچ ياسنابس دوم رويانه
عندچ ناس والله وشكثر طيبين
كل طِيب النفوس انشمها بَجْوانا
قطيف اليوم كلهم برضچ ايزرعون
شتلات الشجر والثمر بغصانه
كل من يسمع اسمچ تاخِذه لشواق
من شوق الزهور الكل تِعنّانا
من ارض الوفا يتكوّن البستان
مشتل بالورود النور بستانه
معرضنا المحبه والورود اشهود
يزهي بالبشر والناس بَركانه
حدائقكم يبابل جت لعند الباب
نادي النور فاتح ليها بيبانه
صنابيرك يمهدي يجري منها الماي
تسقي والزراعه ابماي طربانه
يسلطان المشاتل من شجركم بان
غصن الطيب مثمر والثمر دانه
بستانك يا ايمن من نجيه انشوف
من طيبه الشجر بوراقه غطانه
هالتله تراها مِن يِصدِّق كان
قبل ما تنزرع منظرها تلفانه
لكن لمسة الحداد كلها افنون
حداد الاناقة اوريشه فنانه
أُسرنا المنتجه محلاتها من اييد
من تحت الستر هالاييد شبعانه
لدرازي ابخبز لول يعيد اليوم
من عاد الخبز بالفرحه خَلاّنا
اياديكم كريمه ابكل عمل للخير
من طيب الأيادي الطيب جُوّانا
يشهد كل عملكم يالبنيتو النور
اساميكم كتبها الباري سبحانه
عملكم ينحسب ليكم سبِعْت اضعاف
كل واحد يزيد ابكفه ميزانه
نشكركم شكر من تدعو للمعبود
لله بالدعا ضيفوها أسْمانا
……………………………………………..
ابو مصطفى ال يوسف
26 مارس 2019
19 رجب 1440 هـ
