في حب البلدة الجميلة القطيف وتراب الوطن الغالي
…………………………………………
اشلون ديره اتقول عنها ابلايا ماي
شفت عمرك ماي يمشي ابلا ثرى
انت بس جرب تجي ارض القطيف
واحكم ابنفسك اذا فيها جرى
لا اتفكر لا اتخطط بَيْ مكان
عدنا ديره امن البلاد الفاخره
من سما الديره نظرنا بالنهار
شفنا من فوق المدينه امشجره
من نزلنا شفنا فيها اشكد جمال
هم عرفنا اشكد حياة اميسره
لكن ابممشاك تقصدها ابنهار
والصغيره اتصير چنها امكبره
لا تحسبني اضيع وقتي ليل
من حلاة الليل عيني ساهره
لو اوصف لك وجوه امن الكمال
والحِسن تعجز احروفي اتصوره
لا تلوموني اذا عنكم خفيت
والصور خليها بس للذاكره
خوفي اكثر لو ابجوالي سهيت
تروح عني كل صورها الساحره
فيها لحظاتك تمر مر السحاب
من تروح المطره تصبح فاتره
لا اتلوموني اذا اصبح بخيل
ما ارّسل كل صور بالكيمره
لني اظلم بالوصف هذا الجمال
شوف بعيونك يظل افضل ترى
تالي تعذرني اذا رحت المكان
شفت حسن اوجوه كلها ناظره
القلم والصور تعكس لك شعور
لكن ابشوف النظر ما تحصره
فيها طيب الناس والقلب الكبير
لو اوصف لك اقلْها جوهره
هالبلد مصدر ينابيع الجمال
هم على العالَم جماله ايصدره
واللي زار الديره لابد من يعود
والخَبر مزيون لابد ينشره
كل جمال الكون مولود ابمكان
كل شي من ذاك الجمال اتخيره
ديرتي فيها ينابيع العيون
تسقي دوحه امن الزراعه المثمره
ديره واجزم فيها احلى الذكريات
فيها ربعه والصداقه ظاهره
جَمعة الاحباب تترجم سرور
مثل صحبتهم اظنها تنشرى
الشكر لله جمعنا اعلى الاخاء
نعمه والله هالبلاد اومفخره
بلدتي تنقاس بالحب والامان
وكل ظروف العيشه فيها اموفره
طيبها انشوفه علامه بالصغار
بالوجوه انشوف فرحه الغامره
الله يكتب للذي عاشو سنين
عمّرو ديرتنا حسن الاخره
والكبار ابهالبلد تزرع وقار
والبذور اورود منهم مزهره
والوجوه السمحه تشرق بالمكان
وجه بالايمان يبهر منظره
والابوَّه والامُومه ابهالزمان
طيب لقلوب ابصدرهم مصدره
محلى ذاك الدعا بين الامهات
تدعي الله وكل عملها تنذرَه
ندعو لله ايفرج اهموم الشباب
تصبح البلده ابسواعد قادره
فيها صوتْ الله اكْبَرْ بالأذان
فيها حيّ اعلى الصلاة امعطره
فيها تقصد للمساجد احلى ناس
اوجُوهْهُم وقت الصلاه متنوره
فيها ايات الذكر تقرا ابخشوع
فيها اصوات الحناجر جاهره
فيها عنوان الضيافه ابكل مكان
تفتح ابواب البيوت العامره
وبأرضنا الخير من فوقه نسير
لله ندعي الخير لينا ايْكثرَه
والسحاب ابديرتي ينزل ثجاج
يغمر اقلوب العباد ابكوثره
والشمس تسطع على الديره ابشروق
بالغروب احلى ضياها تنشره
امشي ساعات ابدرب بين البيوت
وانظر ابواب البيوت امستره
والجرس ما كان عد (عند) باب الدخول
كانت الكلمة احِمْ لمدستره
لامشيت اسمع كلام الامهات
عالبنات اتنادي وين الشاطرَه
وحده منهم تسمع اطِّْيع الكلام
وحده منهم تبتدي بِمْكابَره
وحده ترضى لكن ابحيله تقوم
طفله وتريد ابحچيها امسايَرَه
وحده شيخه نسخه من امها تصير
تحمد الباري عليها وتشكرَه
لكن اشگد عاندوها ما تقول
غير كلمات الدعا ولمغفرَه
توصُف ابنياتها اباحلى جمال
وحده ذُرّه وحده منهم مرمره
هذا بالفطره مثال اعلى المديح
بالصدق لكن قلبها يشعرَه
لو ادَوُّر كم صور فيها الحياة
ما احصّل صوره مثلچ باهره
وبسمانا اتغرد اسراب الطيور
فوق شاطينا ابسلام وتعبره
ابكل شواطى الديره تتلاقى الطيور
بينها وبين الشواطي امجاوره
كل سنه موعد مع الشاطي يصير
تلتقي بهْ اطْيُورنا ولِمْهَاجِره
والحمَام ابحوشنا تطرب هديل
ليها ببيوت الفسيحه امسامره
كل عصافير البلد تهوي ابسلام
فوق لعشاش ابنخيل امحدره
وبوقت لِسْلُوم تهبط عالغصون
تالي من تصبح تطير امغادره
نسمع امواج البحر فيه اهتياج
يعني كوس البحر عنده امناجره
وبحدود السِّيِف تلقى الانسجام
تلتقي الموجه ابرماله اتحاوره
تترك ابسِّيِف البحر النا غرام
تاخذ اوياها كَدَرنا وُتِبْحِرَه
دوحة الموال وُفْنون الكلام
والشعر بَحْلى القصايد تنقرَه
والنواخذ تعرف اسرار الغبيب
غوص للولو وبهيرُه مَكْثرَه
مَنْتَب (سيخ معكوف) الصيّاد بالخبره يصيد
صيدة الهامور داخل ميفره
والتجاره ابديرتي ربح وأمان
والأمانه بين بيع وُمْشترَه
كانت الناس ابعشق ذاك الزمان
تعشق الليله الجميله الماطره
فطره كانت بالنسا لبس الحجاب
تمتنع تخرج ابصوره سافره
ديرتي للسِّلِم تعشقها الحَمَام
ريشها اتصير الدواه للمحبره
كِتبت التاريخ من اول سطور
ديرتي اتحب السِّلِم وتآزرَه
من وصل مرسول من طه الامين
دِخلت الاسلام دون امشاوره
من اجى المرسول شميِّنا العبير
صارت الديره ابعبيره امبخَرَه
طيِب شميناه وابعطره عجيب
منوجد بالكون مثله ايناظره
بس عرفنا لنّه من اييده يفوح
لنه قبل اييد طه اوعطَّرَه
گلْنا للمرسول للهادي تُعُود
خِذْ عَهَد منّا بُولايَة حيدرا
وابتفاصيل الرساله مؤمنين
وابْشَرايين القلب حبه سرى
وابكتاب الله نظل متمسكين
نمسك ابحبل الوصي ونّاصُرَه
لاصنم نعبد ولا عدنا عبيد
وابرسول الله العبيد امحرَرَه
عاد من رحله طويله للرسول
بعد ما بَلّغ كتابه اخْبَرَه
يا رسول الله بذَر منهم كلام
بسمك الدعوه من الله المغفرَه
والذنب منهم عرفته امن الوجوه
شوفتك عندهم بدت متأخرَه
من رجع للهادي وصَّفنا يقول
اقلوبهم بمحبتك مِتْنَوُرَه
واللي تشهد غير اسلام القطيف
كل شهايدها تصير امزوره
نلتقي وياكم ابديرتنا دوم
والوطن فيه الديار امطوره
بختصار اللي تشوفه بختصار
كل وطنا انشوفه دنيا امصغره
…………………………………………
ابو مصطفى ال يوسف
28 ربيع الاول 1440 هـ
25 اكتوبر 2019
