في حق مسلم بن عقيل عليهما السلام
…………………………………………
يالتزور اليوم مسلم .. حُولِه زوّار البشر
والقصر عمدانه طاحت .. واندثر ماله اثر
…………………………………………
(1)
سار مسلم للمهمه .. يقطع ادروب القِفار
بييده تعيين الإمامه .. فيها مكتوب القرار
تاخذ البيعه يمسلم .. وارجع اكتب شللي صار
منهو قدّم لينا بيعه .. منهو قدّم لعتذار
وضُّح المكتوب لازم .. بالدرُب لحسين قادم
والقضيه مو اماره .. دين لسلام ابخطر
…………………………………………
(2)
من دخل للكوفه مسلم .. رحبّت كل الرجال
فتحت ابيوت ابحفاوه .. صوره غايه في الجمال
قدّمت باليمنى بيعه .. كلها للطّاعه امتثال
بين بيت وبين مسجد .. سهِل كان الانتقال
قدمت طاعه وولايه .. هاذي اولها الروايه
يا احسين اقبل علينا .. اينعت بان الثمر
…………………………………………
(3)
خلنا نتخيل الكوفه .. والشمل من جمَّعَه
صار بالمسجد يصلي .. والعشاير تتبعه
خلفه ملتمه الأشاوس .. يقرا آيات الدعا
يوم سلّم دار عينه .. ما لقى من يسمعه
خلفه بالآف كلهم .. لحظه وابإييده يعِدْهم
حسره هل ادموع عينه .. وانطعن خلف الظهَر
…………………………………………
(4)
كان بين الناس يمشي .. مسلم اعليهم امير
والنوايا اليضمروها .. بيدهم يصبح اسير
يدري بحوال الضماير .. مسلم امحنّك خبير
والعهود اللي اكْتَبُوها .. بالعهد حبرن يِطير
بيعه كِتْبُوها ابكتبهم .. وانشرى ابقيمتها درهم
اتبدلت لحوال سرعه .. وانقلب حال الدهر
…………………………………………
(5)
موقفه ما مال عنّه .. يوم نكثو بيعته
صار هوه البيعه كلها .. وفْدَى ليها رُگْبته
يِنطُق الحق ابلسانه .. هذا مسلم عادته
ارسله احسين ابضمانه .. يعرفه بن بجدته
يذكُرُه احسين ابكتابه .. من ثقاتي والقرابه
حاز عنوان السفّاره .. والشهاده والفخر
………………………………………..
(6)
صار وحده ابلا امناصر .. لا معين ابغربته
من بعد لرجال صارت .. طوعه حرمه آوته
قضّى ليـلِه بالعباده .. والنهار ابحيرته
من طلع فجر المصيبه .. قوم اميّه وُصْلته
مسلم ابطوع الامامه .. ما نفع فيهم كلامه
من نظر ليهم وعَظْهم .. ولحقد غشّى البصر
…………………………………………
(7)
نامت اعيون الخيانه .. ما غَفَت عين الأسد
مات والبتار شاهُر .. منحنى لا مَنْغَمد
صار للمظلوم صرخه .. ظل صداها للابد
بدَّلَت قصر الأماره .. بالسفاره ابكل بلد
قصتك مسلم فريده .. نهضه من صلب العقيده
فيها اسرار وعجايب .. تِحْتَوي كلِّ العبَر
…………………………………………
ابو مصطفى ال يوسف
21 ذو الحجة 1441 هـ
11أغسطس 2020
