وصف الرباب لحالة ابنها عبد الله الرضيع عليهما السلام.
………………………………………..
آنا امَّك .. اشكي هَمَّك
ونت تِشْكي لِي دِماك
………………………………………..
(1)
اه يبني امنين اجيبه .. الماي يبني امنين اجيب
نظرت اعيونك يغالي .. ذوبت قلبي ابلهيب
صوتك ابمهدك شجاني .. وُعْتَلى مني النحيب
لكن اشبيدي اجي لك .. ما يِذُر مني الحليب
ايسيْل دمعي .. وآنا ادعي
ليت يرشف لك شفاك
………………………………………..
(2)
من شفت لحسين جابك .. منيتي ابعبد الله طاب
تالي من انظر عيونك .. ينكشف لَيّه المصاب
من اشاهد وجنتينك .. امخضبه يبني بخِضاب
من شِفت منحور نحرك .. طاح قلبي اعلى التراب
ترْبُه نُفْضُه .. قلبي نَبْضُه
لَنِّه ينبض من دماك
………………………………………..
(3)
ولأشد يِقْبُل عليّه .. ليل وبْحِزني يطول
من يِطِل صبح ابْلا شُوفَك .. امَّك ابحالت ذهول
بالمهد صوتك خفتَّه .. ساكت ادري بك خجول
انتهت يبني ابحياتي .. ابموتتك آخر فصول
بوح لَـمَّك .. من تشِمَّك
تِنْطُق ابنحرك دماك
………………………………………..
(4)
خذتك امن احسين بيدي .. حسّبِت نام الجميل
من اريد اعْدِل مَنامَك .. رُقْبِتك يبني تِميل
اه ياويلي لمحتك .. منحرك بالدم يسيل
نَبْلَت الظالم تعدّت .. حِدّت السّيف الصقيل
چنت اسايل .. ليش مايل
وَعْدِلَك تِشْخب دماك
………………………………………..
(5)
ما شفت ميت يعقلي .. تنطق ابموته شفاه
بسمتك يبني ابشفاتك .. اغلى عندي امن الحياه
چنِّي من بسماتك اقرا .. يُمّه قِتْلُوْني الطغاه
لا تظنِي يُمَّه طفلچ .. عاف مهده اوْ ما نساه
ما نسيتك .. يُمَّه جيتك
لكن ابمهدك دماك
………………………………………..
(6)
من ردت اطلب لك الما .. رحت لحسين ارتجيه
راح بيك احسين ساعه .. وَأسْمَع اصراخك دويه
الكون لجلك صار سكته .. بس انينك يعتليه
جابك ابلحظه اوْسمعته .. قال عبد الله اندبيه
ما عرفتك .. بس ندبتك
وجهك امغطى ابدماك
………………………………………..
(7)
موقف الهيَّج شجوني .. حرمله من صوَّبَك
ما رحم يولدي صغرك .. سهم حقده خاطبَك
ما سَقُوك ابماي جُرعَه .. صار موتك مشربَك
بالسما ادمومك نثرها .. احسين ولكون ارتبك
احسين ذرها .. من اثرها
بالسما تترك دماك
………………………………………..
ابو مصطفى ال يوسف
2 ذو الحجة 1438 هـ
24 اغسطس 2017
