توصيف حال الامام الحسين عليه السلام مع اخيه العباس بن علي عليهم السلام.
التفعيله:
مستفعلن مستفعلن مستفعلن مستفعل
القفلة:
مستفعلن مستفعلن مستفعلن فعولن
__________________________
عباس صعبه نزلتك يابو الفضل عليّه
حيره ويفت قلبي الطلب مثل الصخر عليّه
__________________________
(1)
لوعة افراقك يالأَخُو كِسرت ضلوع ابصدري
فوق القلب متكسِّره انزف وجع من صبري
أَنظر على اعيونك حزن دمها عليّه يجري
المس على قلبك جمر يلهب عطش من جمري
والان زادت وُحدتي زاد الحِمل عليّه
__________________________
(2)
بحسابي ما اتروح النهر ناشر عدونا اجنوده
والجيش كلّه ينتظر توصل يخويه احدودِه
انت العمد وانت الذخر انت اليهمنا اوجودِه
والجود يا ليته انمزق لا عدنا (عندنا) خيط اجلوده
لكن عطش ال النبي زاد العطش عليّه
__________________________
(3)
حامي الخيم لا تبتعد وانت العمد لخيامي
سور المعسكر ينهدم مِن للحرَم يا الحامي
نورك ابعيني كالنظر وانت الظهر واحزامي
يا نَفْس اخوك ابهالعطش انت الفؤاد الظامي
بعدك عدونا يفترق اربع فُرق عليّه
__________________________
(4)
عباس ظلُّك ينفرش ينزع لهيب الحرّه
لو غاب عنّا نفترش بعده يخويه الغبرى
اختك تعيش ابلا عطش ظلّك حياة الحَورا
لكن اذا تنوي النهر انوي الرجوع ابكثره
والجود مايه لو نشف خَلّي النهر عليًه
__________________________
(5)
اركب بنفسي يا اخي وامضي الفرات ابحملَه
انزل ضفاف العلقمي والجود من يتملّى
اغرف ابكفك وانحني لجل الشرب خذ مُهلَه
لكن قبل تنوي الروي خل نيتك عالقبله
واسمع انين العائله وحنّت طفل عليّه
__________________________
(6)
اه اعلى قلب المنصهر في كربلا متعذب
يحمل صقيله الملتهب حِمل العطاشى يتعِب
همّه عليّه مكتمل وافراقنا مترتِب
ساعة افراق اموثقه والكون ظل متعجب
تبكي السما تبكي الارض عاللي جرى عليّه
__________________________
محمد ال يوسف - 1448 هـ
