في مولد العباس عليه السلام
………………………………….
عباس هاليوم تِدلت يَمِّه اقمار
تتعلى تالي تشع من نوره لنوار
………………………………….
(1)
مولود للمرتضى وامَّه نجيبه
يِسْعِد قدومَه وصي الأُمَّه الحبيبه
زينب ابهاليوم بعد تتعنى طيبه
اختك يعباس تظل يمَّك قريبه
من تلفي زينب تِحَشِّمْها يمغوار
………………………………….
(2)
تُوْصَات لامِّ البنين اوّل بنيها
من يمشي عباس مسك زينب بديها
مضرب مثل ينحچى الاخت اوْ أخيها
ما يرضى عباس احد يمشي ابمشيها
هالغيره غيرة علي حيدر الكرار
………………………………….
(3)
وابها الولاده سمعنا يفرح احسين
لمن سمع حيدر ايوصي امِّ لِبْـنين
عباس ذخري وذخر لحسين والدِّين
والزهرا باسمچ فرحها من تفرحين
عباس فرحة أيِّمَّه كلهم اطهار
………………………………….
(4)
تِسْتَر مهجها الأيمه من يِذْكروك
عباس عمنا عَلَم لِـلِّي ينكروك
وابقوتك باس غضنفر من يِشَبْهُوك
دستور للتضحيه لَـمّن يِدِرْسوك
تحضر ملايين دروسك يبن حيدر
………………………………….
(5)
اروي لك اليوم حدث مذكور برهان
ابصغره لحسين نده يابويه عطشان
بالحال عباس رجع للبيت لهفان
بيده قدح ماي ملاها اورجع فرحان
وابچتفه يحمل قدح لحسين من صار
………………………………….
(6)
زينب اتراقب اخوها امن الطفوله
اتْهِز المهد تنشده يا ابن الفحوله
شقيت لقماط يخويه اشها الرجوله
اسمع حچي ابمبسمك چنّك تقوله
لو ردتي زينب اشيل ابأيدي بتار
………………………………….
(7)
من شِيَم عباس اذا زينب يراها
يتعنى ليها ويمد اييده ابرجاها
تنخاه خويه اذا تنطق شفاها
يدعيها خيّتي ولا يقدر بچاها
خوته بلا احسين تصير ابدون معيار
………………………………….
ابو مصطفى ال يوسف
18 ابريل 2017
21 رجب 1438 هـ
