في حق القاسم ابن الحسن عليهما السلام
…………………………………………
جاسم ابطبعه مهذب .. كل حچي اوليدي مُرتب
…………………………………………
(1)
جاسم ابطف كربلا ادّى الأمانه
وضّح التكليف عمّه وامتحانه
من صغر سنِّه ترى اتعدى زمانه
هيبته مثل الحسن عالي مكانه
هيبتَه الهيبه الجميله … من بني هاشِم اصيله
سيرته لليوم تُكتَب .. جاسم ابطبعه مهذب
…………………………………………
(2)
من يجو للبيت عمّاته اوعمامه
يسرع اعلى الباب يبديهم سلامه
منّه الوجنات تشرق ببتسامه
شوفهم يرتاح من حسنه اوكلامه
والحسن بالجود يزخر … جاسم ابنفسه تكرر
للحسن بخلاقه اقرَب .. جاسم ابطبعه مهذب
…………………………………………
(3)
والحسن موصي الى الجاسم حبيبه
من يصير احسين بديار الغريبه
دورُك التكليف يوليدي تجيبه
بييدك اتسلمه الى راعي المصيبه
من طلب من عمَّه رُوْحَه … هيج ابقلبه جروحه
من اخذ من عمَّه مَطلَب .. جاسم ابطبعه مهذب
…………………………………………
(4)
كربلا رسمت على الجاسم سعاده
يوم عمّه احسين صرّح له جهاده
كتبته بحروف من دمّ الشهاده
ثامن ابعاشور للجاسم اشاده
والوسام اللي نشدها … قِلَّه ماحَد مثله خَذْها
سَجَّلِه التاريخ وسهَب .. جاسم ابطبعه مهذب
…………………………………………
(5)
فصلت رمله الى الجاسم لباسه
لبسه من ذخر الحسن بالعِمّه راسِه
هاللِّبَاس الهاشمي هيّج حماسِه
صارمه ابحد الرقاب اليوم قاسِه
بالحرب هالليث زائر … بييده البتار ناحر
ماحَدْ ابْحَدِّه تِعَتَّب .. جاسم ابطبعه مهذب
…………………………………………
(6)
جاسم اعلى القوم من بَيَّن شبابه
يمشي والفرسان من سيفه تهابه
بن سعد عالجيش ظل فاقد صوابه
يوم شاف الشبل حسّب له حِسابه
وانقطع بس شِسْعِ نعله … وقّف ابحلظه يِعَدله
ما درى بالغدر يُضْرَب .. جاسم ابطبعه مهذب
…………………………………………
(7)
رمله بوجاع القلب صارت عليله
تبچي عالجاسم حزنها تشتكي له
فقدتك يوليدي صعبه هم ثقيله
هم سبي هم غربه بالدرب الطويله
يالكنت لقليبى سلوى … ماشيه بُوْدَاعت الله
ما يريد القلبي يتعب .. جاسم ابطبعه مهذب
…………………………………………
ابو مصطفى ال يوسف
13 ذو القعدة 1440 هـ
16 يوليو 2019
