أرشيف القسم: السيدة زينب عليها السلام

في وفاة السيده زينب بنت الامام علي عليهم السلام.

…………………………………

هاليـوم ننـعى زينـب .. ننعى الصّبر لـِمْعذّب

نوح اطفال بيت العالي .. بيت العالي نوح اطفال

…………………………………

 (1)

راحت حزينه فارقت بيت احزان

يوم اللي ماتت ينعى آيِه القرآن

زينب بني هاشم نعتها وعدنان

ابشام الاسى هدّت اعروش الطغيان

باب الحزن له صكّت .. روح العقيله اوصعدت 

وابأي حال صعدت روحچ .. صعدت روحچ وابأي حال  

…………………………………

 (2)

زينب رساله ابكربلا ادتها

زينب مثل حيدر علي زفرتها

بالكوفه هيبة طاغي من هزتها

رجعت صداها الشام وِتْعدتها

زينب وحيها الايتام .. جبريلها صار إعلام

عظُم اهوال زينب قاست .. زينب قاست عظُم اهوال

…………………………………

 (3)

للتضحيه زينب عطت ليها اولاد

صعبات تمشي إلفاقْده هالأكباد

زينب صبرها اعلى النوايب معتاد

ام المصايب ولمحن ليها إشْداد

شهدت محن للزهرا .. كسر الضلع وِلْعَصْرَه

هَمها انزال لا ما ظنّي .. لا ما ظنّي هَمها انزال

…………………………………

(4)

حيدر ابو الغيره طُفَى شمعاته

تمشي العقيله ابليل وقت اسباتِه

امر الله زينب هاذي من ترباته

تلبس حجاب الزهرا نفسه وذاته 

كل هذا ما يِتخيّل .. يِهْتَكْ حِجَاب الأمثَل

مو عالبال زينب تِسْبى .. زينب تِسْبى مو عالبال

…………………………………

 (5)

ابْذِل اليسر مشهد حبسها الانفاس

يوم اللي شافت عالشريعه النوماس 

شافت جرح شافت عمد فوق الراس

احتار الفكر كيف العذر من عباس

عذرچ يخيتي روحي .. وقَّف نَزِفها اجروحي

ظعن إلْشال ذله اوحسره .. ذله اوحسره ظعن إلْشال

…………………………………

 (6)

نزلت ابعزه الكربلا بين اسباع

شالت بعدهم لليسر وسط اضباع

نهشت اجسود الطاهره فوق القاع

ابهالحال تمشي وابقساوه الاوضاع

افراق الاهل نَحّلْها .. تمشي بلا كافلها 

اييد انذال ضربت زينب .. ضربت زينب اييد انذال

…………………………………

 (7)

والدهشه صارت بالقصر ولكوفه

وبشام مجلس طال بيها اوقوفه

صعدت منابر والعلي مألوفه

هم زلزلت عرش الملك واسقوفَه

منطوق زينب قرآن .. كتبت احروفه ابأيمان

تالي مال عرش الظالم .. عرش الظالم تالي مال

…………………………………

ابو مصطفى ال يوسف 22 مارس 2017