…………………………………..
قللي محسن من سقط تارك علامه
ما نشوف احنا العلامه مختفيه
قال محسن سكت حس خلص فطامه
ما بچى من طاح ماحس بالأذيه
دوم نسأل وين اجل صاير منامه
قالهم غافي ترى ابلحد الزچيه
كيف غافي ياعلي ونسمع كلامه
هذا نُوح احسين ويّا الحسن خيّه
ترضى نسأل يا علي لو بس ملامه
لا اتقول اجواب يتعذر عليه
اي حبايل سيف هالجتف إمَامِه
هاللي چتّف حيدره حبل الوصيه
لو قسمنا اعليك بمظلل غمامه
صدق قالت فضه ساتر ما عليّه
بعد يوم الفدك راحت بالظلامه
اشكان تقصد حكم تبغى الجاهليه
اشلون يوم اتحمّدت ليها ابسلامه
ليش ما قامت لك الزهرا الأبيه
ام حسن ندريها ما بيها سئامه
ليش ذاك اليوم بالحجره رميّه
والحطب من صار عد بابك ركامه
اشرح إلْنا يا علي اصل القضيه
تدري ليش اتخلفَوْ عنّه اسامه
تريد تحيي امناسبه سِمْها الرزيّه
ليش عند المغتسل شِلْت العمامه
واحنا من نوحك جرت عدنا عزيّه
نُوْح يا حيدر دَمَع عين الحمامه
قامت ابنوحك تنوح الهاشميّه
ليش سلمان ابسؤاله واهتمامه
لك يحيدر تنحب ابعالي النقيّه
ليش ايدك رجفت ابمسح الكرامه
هيّست مكسور ظلع الفاطميّه
عُرْفت الاصحاب ما يشهر حسامه
يعني ذو الفقّار للموصَى شظيّه
خاطبت بنت النبي القوم ابفهامه
بويه طه والفحل حيدر وصيّه
من هو هذا اللي ابحقد آمر غلامه
ضرب بنت المصطفى خير البريّه
من ضربها ياعلي صوّب سهامه
صدق كانت لك تدافع ملتهيّه
بعد ما خِطْبَت تِوَجّه باتهامه
ماترك ليكم رسول الله وصيّه
الله وابطاها النبي اعلن ختامه
وابعلي الدين اكتمل نصّب ولِيّه
هاذي ما تحتاج لثبات الزعامه
علي بعد المصطفى من نور ضيّه
لكن اللي جار ما حصل مرامه
اليوم للزهرا نظل صرخه قويّه
نطلب المهدي ابفرج ويّا ابتسامه
يرفع احدود القبر تصبح جليّه
…………………………………..
ابو مصطفى ال يوسف
20 يناير 2017
