في حق الامام علي عليه السلام
……………………………………
علي يحمل كل عمل للعالمين
هذي جمله اتريد منك مسطره
كل عمل مكتوب بامر الله الجليل
مو ملَك ملْكين فعلك تسْطره
ارسم انت بالشعر اركان بيت
خلّي دم حيدر يصير المحبره
والقلم نونه وما يسطر عليه
علي قرآن ابسوَر له امعطره
علي من طاح اعلى محرابه جريح
سالت ادموم الامامه الطاهره
علي اركان الهدى اتصلي وراه
من يصلّي اتميل بِرْكوعه الورى
لو سجد يطبق سماها اعْلى الوجود
لو قنت يرفع سما اوياها الثرى
علي حيدر علي جنه اوعلي نار
فاز متمسك ابچنة حيدره
عروة الوثقى اذا بيها انفصام
يعني ما نمسك علي هم نخسره
مثل ما رديت شمس امن المغيب
رجعت ابطوعك ولاهي مجبره
واحد اوعشرين من فجر ارمضان
اشرقت واييد ابن ملجم غادره
رد يحيدر شمس طلعت من شروق
قبل بن ملجم جبينك طبّره
عهد لو ترجع المحرابك نعود
نلقى حوله ارواحنا المتعسره
تعزف ابجيتك تردد لك نشيد
يا علينا إدْركنا دوم اتكرره
تهمل ابمحرابك ادموم المصاب
نفس دمّ البصلات امعفره
اختلطت ادمومك ابتكبير الصلات
والصلات اهيه ابسجود امْكَبِرَه
انطبر هامك يحيدر لك اكيد
لكن اللي طبر هامك ما درى
الصلات ابروحك اتقيم الأذان
يِظَلْ يِحْيَى ابصوتها للآخره
إذَنْ منهو المات بسجود الصلاة
مات غادر بالحقد دنيا شرى
يعتقد بالسيف يخمد هالأذان
يريد هم يوم السقيفه ايكرره
فتنه يخمدها علي وابنفسه قال
ضربه وحده لابن ملجم تنحره
والصلات اتكون لهل البيت ثار
كل وقت كل يوم تكتب تنقرا
إذَنْ مَتْموت الصلات وبيها روح
اللي ماتت روح ضُربت حيدره
……………………………………
ابو مصطفى ال يوسف
23 رمضان 1438 هـ
18 يونيو 2017
