اربعينية الامام الحسبن عليه السلام
………………………………………
ونُّك يجابر بالهون .. وصلت تراها لضعون
جابر نحيبه .. زاير حبيبه
………………………………………
(1)
جابر تِعَنَّى الكربلا يقصد وين
يِمْشِي ابونينه اوْدَمْعَتِه اعلى الخدين
حن ابحنينه وختنق صدر الدين
من صَرْخِتَه يَحْسين يَحْسين احْسين
شَم ابنحيبه .. خدِّه التريبه
جابر يِشِم بيده اتراب .. لوعه ابْفُرَاق الاحباب
زايد نحيبه
………………………………………
(2)
ابوادي الطفوف اتحيرت نظراته
لمن وصل جابر علت زفراته
حافي مشت تالي الدرب خطواته
ظل يغتسل ولماي ماي افراته
دمع اليهيله .. ينزف دليله
جابر لِبَس بيض اثياب .. والطيب احلى الاطياب
زاير حبيبه
………………………………………
(3)
جابر طلب من صاحبه ينشد ليه
قبر الولي من نُوْصَله تِلـْمَسنيه
لمن وصل هم ابعجل طاح اعليه
نبض القلب چنه سكت من حس بيه
بانت علامه .. نبره ابكلامه
من طيحته چنه مات .. قَلْبَهْ اوقفت له الدقات
ينشد طبيبه
………………………………………
(4)
يوم التقى جابر ابركب السجاد
قَلِّه يبو الباقر عزاك ابلمجاد
ليتك يجابر جيت شفت الاجساد
تنزف دما متخصبه امن الأوداج
يوم ادفَنِتْها .. صَعْبه اعْرَفتها
نايم طفلنا اعلى البييد .. محزوز بالسيف اوريد
والله عجيبه
………………………………………
(5)
ابثالث عشر جاني يجابر مرسوم
امشي الطفوف ادفن جسد للمعصوم
حفت ملايك من وَصلْت المظلوم
ولحود محفوره اوسدرها المشموم
بس الملايُك .. ترفع ارايُك
تمشي وُتَعَلّي الصيحات .. للذله تهتف هيهات
تقرى المصيبه
………………………………………
(6)
شفنا ابيسرنا الناس تعبد لصنام
كلها البِسَت ذله ابوجود الظلام
هزتها زينب عمتي ارض الشام
بعد الجهل لَبْسَتها ثوب الاسلام
زينب تراها .. تكفل اخاها
زينب سَلِيلَت طُهْرين .. تكفل رسالت لحسين
حرٌه اونجيبه
………………………………………
(7)
ابهاي الارض نامت رجال التوحيد
ابهاي الارض شبان ضحّت بالعيد
ابهاي الارض فرّت خواتي بالبييد
ابهاي الارض للدين ظل ركنه ايشيد
دم الشهاده .. شيّد عماده
نور اليشع فوق اسماك .. يضوي ابمداه الافلاك
شِيبِه الخضيبه
………………………………………
ابو مصطفى ال يوسف
18 ذو الحجة 1438 هـ
9 سبتمبر 2017
