في حق الامام علي عليه السلام
تجليبه
…………………………………….
محراب القدر هالليله حيدر وين
مولانا تأخر ماهي عاداته
بالكوفه تِعَوّد ليلنا لنهار
والليل ابظلامه تضوي نجماته
نسمع نايحات البين يا محراب
والسجده ابحزن تنعاها ركعاته
محراب الوصي واقف عليه الكون
وركان الهدى اصبح دعاماته
وَصُف جبريل لركان الهدى معروف
يقصد حيدرا بالمعنى كلماته
لما اتهدمت لركان شلْلِي صار
سقف الكون بانت لينا ميلاته
مولانا ابوسط محرابه صلى الكون
من يسجد تدنى الكون بحداته
لمن وصى حيدر للحسن واحسين
بان اموادعه وعطى اشاراته
اعَدِدِ لك وصايا خالده لليوم
وصى المرتضى فيها قراباته
من حوله بناته من وصَى الكرار
عاليمنى الحسن واحسين يسراته
لفعال البشر الله وضع قانون
بالتقوى تنال البشر مرضاته
دنيا وان بغتكم ليها تنجذبون
تُركوها تراها الدنيا شمّاته
صلاة الواجبه عالمؤمنين اكتاب
لا يسبكّم (يسبقكم) الها الناس ميقاته
وانفوس اليتامه لا تمد الاييد
الله باليتامى وصّت اياته
والحق كل حقوق الناس به تنصان
دستور العداله انتون صفحاته
للمظلوم لابد من شكى اتعينوه
للظالم خصم والعدل مشكاته
ذات البين اكبر من عباده اوصوم
من تِصْلَح صلح لنسان من ذاته
بالجيران يوصي جِدْكم المختار
مثل الاهل جاره طه توصاته
والقرآن دستور الحياة ايكون
وانتو بالعمل أوْلى ابشروحاته
بيت الله ابعباده لازم اتعِمْرُوه
حج البيت من اوجب عباداته
من باب الجهاد الدين صرحه ايشيد
بالاموال والانفس تجاراته
صلة لرحام نعمه وتدفع الانقام
ما يجني التباعد غير ويلاته
ولمعروف امره واجب اعلى الناس
من دونه العمل منكر ابحد ذاته
حكم المرتضى من دفّت القرآن
والدكه عليها ابعدله بصماته
ولفتنه قريبه تسكن ابلصدور
ولغادر يشوف الدنيا مرآته
لو مات الوصي لا تنشهر لسيوف
لا اتخوضو ابدماء الناس طبراته
والضربه ابضربه ولا تزيد احدود
قاتل بالقتل يُقتَل ابفعلاته
بفراش المنيه حيدر ابهاليوم
منبع للحياه من وصّى كلماته
حرص المرتضى من تنهدم لركان
لابد من يشيد الدين لُبْناته
خط ابهالوصية الخالده دستور
خلاصة مصحف الرحمان جملاته
حيدر بالوصيّه وصّف المنهاج
من راد الحياة اتصير منجاته
يضمن للبشر فيها رغيد العيش
لمن تلتزم بالدقه وصفاته
يسمح لي الشُعُر ما وفّى بالمقصود
لان متن الوصيه الكون دفاته
سلام الله على المدفون بالكوفه
من يوصل سلامي اترد سلاماته
…………………………………….
ابو مصطفى ال يوسف
20 رمضان 1440 هـ
26 مايو 2019
