في مصاب الامام الهادي عليه السلام
………………………………………………
يالهادي جواد احسين .. نسأل وينه يسرح وين
واقف بعده بالكوثر
………………………………………………
(1)
سُمَانه لو عليك اتنوح .. لكن منلِحد جسمك
لا شافت صدر بِسْهام .. لا شافت نحر دمّك
نعشك ما يبات ابّييد .. بيت العائله ضمّك
والسّم هالحرق چبدك .. نفس اللي ابچبد عمّك
وانت اللي ابضواك اتبات .. تقرا امن الذكر آيات
صلاة الليل لك تسهر
………………………………………………
(2)
يالهادي عليك اليوم .. تظل سامرّا محزونه
للمشهد تجي الوفّاد .. كل من حزنه بعيونه
تحمل لك نعش مرفوع .. حتمن ماهي مجنونه
شالت من صدرها اضلوع .. نعشك صاروا يبنونه
وادموع الحزن لشموع .. تنزف من قلب موجوع
للهادي جمر تسعر
………………………………………………
(3)
كان ابمشهدك فانوس .. تحضن نوره القبه
عدوَّك بالحقد اعمى .. نورك ما دخل قلبه
لمن قبتك هدّم .. نورك للفضا شبّه
صارت عالشمس لنوار .. صعبه ما تشع صعبه
حجر من قبته بنيان .. باني للشرُع اركان
من جده الوصي حيدر
………………………………………………
(4)
سامرا بدت قفره .. قبل ما توطي اقدامك
حجّت تالي ليها الناس .. بعد ما عاشت ايامك
كِنت ليها الزَرُع والماي .. كعبه تنشر
اسلامك
تسعى المؤمنين اهناك .. عطفك تتطلب ايتامك
ابدارك تجتمع واتصيح .. عاميها البچى واطّيح
تقوم اوتالي تتعثر
………………………………………………
(5)
غريبه الفاقده غالي .. تطلب من يواسيها
يالهادي عليك املاك .. تبچي من يسليها
اجت سامرا بالاحزان .. رجعت لا حزن بيها
لمن لـِمست الشبّاك .. حسّت اييدك اعليها
انفاسك تهب نسمات .. تشفي بالقلب علّات
صَعُبْ نُوْصُفْهَا ما نقدر
………………………………………………
(6)
انا ما ينوصف حالي .. مِن انْظُرْ مناراتك
اشوفك معتلي بيها .. تعاين منها عمّاتك
تشوف العلقمي امن ابعيد .. مايِه ايصير مرآتك
تشوف اعلى النهر عباس .. وتبچي احسين وجناتك
وتسمع ونّت الاطفال .. تنظر بالطفوف اهوال
واحنا ادموعنا تهمر
………………………………………………
(7)
تالي اتغيَّر المشهد .. شفنا الشفه مبتسمه
واتعاين على القبه .. عليها الرايه ملتمه
تحت القبه ناس اشهود .. بييدك واحد اتسلمه
عطيته الرايه للموعود .. همسه ابوحدك اتكلمه
فهمنا الرايه من تلتف .. ثارك يبتدي بالطف
تزيل اهموم من تظهر
………………………………………………
ابو مصطفى ال يوسف
27 مارس 2017
