في الامام موسى الكاظم
……………………………….
غيبه وسجنها السجان .. يمتى ترد للأوطان
كل من قال يطلع سالم .. يطلع سالم كل من قال
……………………………….
(1)
أدْعِي ابجوار المرقد اترجتيك
شوفي قِصَر ويّا العمر ما جيتك
وآنا ابحلم لهفه والك ضميتك
ارجو السماحه سيدي ناديتك
اوقف ابْسور العالي .. انعى وعاتب حالي
حلمي طال وآنا بحضنك .. وآنا بحضنك حلمي طال
……………………………….
(2)
حلمك غلب غيظك وتالي اكْتَمْته
هذا الحلم منك انا اتعلمته
لكن صبر مثلك صبر ماجبته
ابصدرك يموسى هالصبر مَحَنْتِه
صبرك عرف منهاجك .. مجرى الدما ابأوداجك
هد اجبال صبرك چنّه .. صبرك چنّه هد اجبال
……………………………….
(3)
سم الصبر كم اشربت من كاسه
سم الجسد تشرح صعب كرّاسه
ولأمر يا ابن المصطفى من ساسه
منهو الخنق بيت الرساله أنفاسه
سال ابفعلهم دمك .. والزهرا تسأل يمّك
يبني اشحال چبد الغالي .. چبد الغالي يبني اشحال
……………………………….
(4)
مُظلم العَالَم والقمر صابه اخسوف
شمس الامامه اليوم حاجبها اكسوف
ومن البچى حمره النواظر ما اتشوف
تبچي سمانا والدمع دم مذروف
واحنا اعلى بابك بحزان .. بقلوب تلهب نيران
دمع السال دم امصابك .. دم امصابك دمع السال
……………………………….
(5)
جسر الرصافه نذكره ونتألم
جت شيعتك تدعي الك بس تسْلَم
مطروح قالَوْ ولجسد مطلي ابدم
والروح هامت بالچبد ويّا السّم
خلّف فراقك ليتام .. شال اويا روحك لسقام
هاللي شال موسى الكاظم .. موسى الكاظم هاللي شال
……………………………….
(6)
صوت المنادي مات بن جعفركم
ان چان جيتوا الطلعته بخبركم
مسموم ظني هالخبر مَيْسِركم
شَيْعُوه تالي ابثار اله يطلبكم
ابقيد السلاسل خلُّوُه .. سم ابحقدهم چتلوه
كم حَمّال سارَوْ ابنعشه .. سارَوْ ابنعشه كم حَمّال
……………………………….
(7)
ابداك الزمن من مات نسل الامجاد
ما حد وصل له ولأهل كلها ابْعاد
هاليوم سرنا والجنازه ابغداد
مَلْها طرف ملها قدم بالأصفاد
ما تنعرف ليها احدود .. ما دام شيعي موجود
ابموتك زال ظالم عرشه .. ظالم عرشه ابموتك زال
……………………………….
ابو مصطفى ال يوسف
20 مارس 2017
