ابوذيات مختارة
……………………………………….
وعدنا
رحنا الشام يا خويه وعدنا
عاين من نَقَص بيِنا وعدنا
مصيبه اشلون اذّتنا وعدنا
خبر نحچيه عن بنتك رقيه
رجعنا
كم عددنا
عندنا
……………………………………….
وطبعه
علي ما ينرسم وصفه وطبعُه
حبّه بالقلب اصلي وطبعَه
اخليها ابدما جسمي وطبعُه
ويصير الدم طبع حامي الحميّه
اخلاقه
ختم
اغمسه حتى الاشباع
……………………………………….
ولشراف
يا ارض احتوت ساده ولشراف
جفن العين حسِّيْتِه ولشراف
ملايكت السما اتراقب ولشراف
عليها ايصير واتسجل عليّه
السلالة النبوية
اهتزاز الجفن
الاطلاع
……………………………………….
فضلهم
اهل البيت ما ننكر فضلهُم
كل لوجود وابْوِسْعُه فضى الْهُم
والخنّاس ما حبهم فَضَلْهُم
وتاه ابدنيته واخْرى سويّه
الاحسان
لهم الفضاء
اضاع السبيل
……………………………………….
وقيمه
كل اللي انعوج صَلحه وقيمه
وابني اجدار حق سورك وقيمه
وتُصبَح دوم إلِه سِمْعه وقيمه
بظهورك يبن خير البريّه
اعدِلْه
جعله قائما
قدرا وشأنا
……………………………………….
والمرسلينا
بيت العصمه هُم والمرسلينا
سفينه للنجاه والمرسى لينا
مَسَكْنا اعلى الجمر والمُر سلينا
لجل حب النبي وآله سويّه
الرسل والانبياء
مرسى السفينه
تحملنا المراره والعناء
……………………………………….
مُرْبُك
يليت الأمل مَرْني ومرَّه مَرْ بُك
وضعي ابدون هذا الامل مُرْبُك
يراعي الغيبه ندري الغيبه مُرْبُك
ورجانا اهموم قلبُك مِنْسَلِيّه
(1) ذهب اليك (2) مضطرب (3) ضد الحلو
……………………………………….
من جبلهم
غدير الماي نازل من جَبَلْهُم
وكل اللي يصافح من جى بَلْهُم
لِكِل اهل الولايه منجى بَلْ هُم
صراط وُتِسْلُكُه كل البريّه
(1) من الجبل (2) بلل كل من اتى (3) مكان النجاة وايضاً هُم …
……………………………………….
رتبلها
وجناتي ابدمع لك رِتْ ابِلها
وماحد هالمجالس رتَّب الها
لدموع ابمصُابُك رُتَبْ الها
وضاعت بالكورونا الرُّتب ليّه
اردت ان ابللها
جهزها
لها مقامات
……………………………………….
جنِّبِي إبْها
هالبيعه ابرساله جا النبي إبْها
يا خُـم هالقوافـل جنِّبـي إبْها
غدير المرتضى لِه جّنَّه بَبْـهـى
صُـوَر للمـاي وانهـاره الجـريّه
اتى بها النبي صلى الله عليه واله وسلم
اجعليها بالجنب
جنّة بأجمل
……………………………………….
على ما
على ما انقتل يا عالَم على ما؟
قلبه امن الظما اتحسّر على ماء
عطش لحسين لُفّاده علامه
ابْصدره صار كالجمره اللظيه
على ماذا؟
على شرب الماء
أثر
……………………………………….
متاهه
ارضچ كربلا الليله متاهَه
متى الأطفال والزينب متاها .. (مدَوَّر)
يرِد لحسين لكنِّه متاها
لنّه منقتل فوق الوطيّه
ضياع
متى؟ بِهَاء الضمير
لم يأتي اليها
……………………………………….
وضاعن
خدر بالنار يتصاعد وضا عن
قمر هاشم خفت ضيّه وضاعن
حريم اتيممن لكن وضا عن
سياط ارجاس بِيد ابن الدعيّه
ملاحظة: جناس مدَوَّر
اضاء بدل
تاهن
وُضُوء عن
……………………………………….
وَشَدْها
مصايب كربلا مرّت وشدها
شِفْت ابعيني هالمنظر وشدها
وأي امصيبه يالتسأل وشدها
دهتني امصيبة احسين الشفيّه
أشَدَّها/اعظمها
لفت انتباه
(ادهى) ايها أمَرْ
……………………………………….
ابوذية لرواح
تتواعد عشق كل جِمْعَه لَرْواح
تعَّبْها المسير ابْكِثِر لِرْواح
تطلب من اهلها ابوقت لِرْواح
تُوْهِبْ من ثواب إلْها هَديّه
الارواح
المسير ذهابا
وقت بين زوال الشمس والليل
……………………………………….
ابوذية دحرها
كتايب عن ابو الزهرا دَحَرها
ولَمُّه بت اسد فارس دا حُرها
وحِسَّادُك يبو اليمّه دُحُرْها
ابضربات الفقَار الحيدريّه
دفعَها
الحُر
خلهم يحترقون
……………………………………….
دراهم
من عصر الجهل طه دراهم
تِغريهم طمع حفنة دراهم
بالإسلام وابحيدر دراهم
نقدهم من ظلم هالجاهليّه
عرفهم
المال
حماهم
……………………………………….
كَسَبْهُم
كل من حَبْهُم ابدنيا كَسَبْهُم
واللي ايعاند امْحُبْهُم كَسَبْهُم
الله ابعترة الهادي كسى ابهم
سماوات العلا وصارت مُضيَّه
من الكسب الربح
كالذي يسبهم
الكساء
……………………………………….
وُشْحَن
صُب كاس الهضم يازمن وُشْحَن
ليالي الهضم كلهن سُود وشحن
عليّه يازمن حنِّيت وشحن؟
تچويني ابجمر واتحن عليّه!
املئْه
توشحن اي لبَسْنَّ
صيغة استفها: ايُّ حنين؟
……………………………………….
واعيان
وصفتك ياعلي والبال واعيان
حبُّك عسل يجري ابنهر واعيان
فَقَارُك خَضَّع القامات واعيان
خَلّى ارقابها ابحد المنيّه
الوعي / إدراك
نبع مياه غزيرة
كبار القوم / اشراف القوم
……………………………………….
رواها
من نَزْف الجُرُحْ روحه رواها
علي قَص حالته ولينا رواها
كَشَف جرحه من الطبره رواها
املاك السما وناحت سويّه
اسقاها (تعبير مجازي)
حدَّثنا عنها
جعلهم يرَوْن
……………………………………….
قِبْلَه
دَخَلْت المَشْهَدك من باب قِبْلَه
علي بَابُك تَرك بالشفَّه قُبْلَه
حبُّي لُك عِشُق والْكان قَبْلِه
لبن امي اعلى حبُّك عِشُق بِيَّه
باب القبلة
تقبيل
سبَقه
……………………………………….
علامه
يَغَايِب واشْكُثُر ظَلَّت علامه
مُحال الصُوَّر نِرْسِمها على ماء
على ما نِسْتِند سِيِدِي على ما
علامات الفَرَج صُعْبَت عليَّه
اشارة او دليل
على الماء
على اي شئ؟
……………………………………….
تُرُبْها
متى ابْچَفَّك فَدَك تِرْوِي تُرُبْها
وانت اعيون للزهرا تَرَى ابْها
بهيّة طلعتك واهيَّه ترى ابْها
عليها طلعتك يبن الزچيّه
التراب
تنظر بها
من البهاء بصيغة التفضيل
……………………………………….
منصاب
سهمچ كربلا العباس من صاب
باب ام البنين انشلع منصاب
دمع العين منّا اليوم منصب
ننعى ام البنين ابهالرزيّه
منذ اصابه
اصابته علّة
ينزل او يهل الدمع
……………………………………….
جتلها
ملايين ابوقت واحد جت إلْها
ماظن يوم عاشورا جتلها
عنوان النجاة المن جى تلها
زينب شافعه ويّا الزچيّه
اتت لها
قتلها
جاء الى التل الزينبي
……………………………………….
وضعنا
من دونك علي تِهْنَا وضعنا
ما نشكي لحد غيرك وضعنا
علامه المرقدك لينا وضعنا
تدلينا ابصراط الحيدريّه
من الضياع
حالنا
نصبنا
……………………………………….
وعوده
الك يبن الحسن طلّه وعوده
جنّه الأرُض بوجودك وعوده
يمتى ابيوم يوفينا وُعُودِه
ويزهي الكون بالطلعه البهيّه
رجعه
واسعه
الوعود
……………………………………….
وعدِّه
اجهز لك مضيف آنا وعدِّه
لكل زاير قطع دربك وعدَّى
ترى اليوم اليمر يخلص وعدِّه
من ايام العمر محسوب ليّه
الاعداد والتجهيز
مر من خلال
العد والحساب
……………………………………….
محمد ال يوسف
