في استشهاد ابا الفضل العباس بن علي عليهما السلام.
………………………………….
اليوم عباس براضي كربلا
نهر لفرات ابجوده شايله
………………………………….
(1)
نوح لطفال يِفَتت مهجته
راح لحسين يناشد رخصته
رخصته ابعين اخوه ودمعته
ودّعه احسين وزينب ضمته
خلفه لطفال عطاشى معوله
………………………………….
(2)
سار بالجود وشاله اعلى الظهر
وعين لحسين تعاين عالقمر
فرّق الجيش كشف حد النهر
سيفه برقابُهُم تارك اثر
والصناديد تهاب اتنازلَه
………………………………….
(3)
ارعب اجنود اميّه ابحملته
يقبض ارواح حسامه وخزرته
غرف لُفرات ملاها گربته
كلها لطفال تحاتي رجعته
وليها يروي الشفاه الذابله
………………………………….
(4)
خاط عبّاس على البيرگ نذُر
والوفا اليوم الى الزهرا الأمُر
لفدي روحي لبو اليمه النصُر
وام لبنين جزاها بالحشُر
توفي لچفوف نَذُر للفاضله
………………………………….
(5)
بين لفرات وبينه اشگد عتب
يذكر احسين وعبّاس انتحب
چفه بالماي ترسها وما شرب
ماي لفرات من إعْتَابِه اضطرَب
اعتاب عبّاس عَطاشى العايله
………………………………….
(6)
راد بالجود يجي صوب الخيم
سدد الجيش على اعيونه سهم
فوق لرمال سقط منّه العلم
شاهر السيف وظل يقسم قسم
لحمي دينِ النبي سَيْد الملا
………………………………….
(7)
زحفت اصفوف عليه امدرعه
حوّط الجيش حدود المشرعه
جاه لحسين وعاين مصرعه
راسه مفضوخ چفوفه امقطعه
تروي لطفوف دماه السايله
………………………………….
(8)
فكري مذهول وجيتك مِعتني
قلبي موجوع و ظهري مِنحني
وين لچفوفوف يليت اضُّمِني
خويه عَبّاس فِراگك هَمِّني
والأخوه عليك امفصله
………………………………….
(9)
بين لحسين وعباس اشجرى
گلِّه ياخويه منّي المعذره
سلِّم اعلى العقيله الطاهره
گِلها عبّاس طريح اعلى الثرى
يختي وصاچ تصيري الكافِلَه
………………………………….
(10)
كل طفل صار ينادي بالعجل
طِفِل عطشان وطفله بالوجل
كلهم ابصوت وكل واحد سأل
واعد ايعود اوعمنا ما وصل
قرّب الليل اوعمنا بالفلا
………………………………….
(11)
شالسبب عمّه عمنا ما رجع
لا عطش نشكي لا نشكي وجع
ذاب قلبي يروحي وانفجع
عمكم اليوم على الغبره وقع
اتوسد اتراب اراضي كربلا
………………………………….
ابو مصطفى ال يوسف
6 ذو الحجة 1441 هـ
23 يوليو 2020
