Author Archives: محمد آل يوسف

في حب النخلة وعلاقتها بالفلاح المزارع

وفضلها بالقرآن الكريم

……………………………………………..

احب اكتب شعر مقصوده للفلاح

واحب ام السعف والليف لِمْطَلْعات

منبَّت للطَلِع مابين سَعْف ولِييف

وشتَم من طَلُعْهَا ريحة النخلات

تِحْمِل من رُطَبها انخيلنا بالخير

من بين السعف تِتْهابَب النسمات

تتغذى الارض من اييده الفلاّح

والنخله وَدُودَه تعرف البصمات

من يِخْرُف تمرها كل سعفها ايميل

لجله تنحني من لامس التمرات

رِجْلِه بالمساقي تِنْغِرس بالطين

خطواته عميقه تِنْعش البذرات

والكَرْ من سعفها وخوصها واللِّيف

بالقفّه يِجَمِّع زِيْنَة الرَطْبات

فن عنده المُزارع من يرّبي انخيل

يِرَوِّسها ابعدال الماي بِشْرُوبات

اذا صار العدق مثمر وثِقْله بان

يِقَوِّسْها ابحدر تحديره بالحَسبات

شماريخ العِدِق يعرفها لمّا اتميل

تتدلّى ابخجل من صارت امبسرات

من يِحْضِن كَرَبها تبتهج لعدوق

يخرف من عِدِقْها الرُّطَب لِمْهَمدات

من ينزل بعد ما يخرف الها اعدوق

شعورُه اشگد يريد يكرر الصَّعْدات

يحْييها ويِهَوِّي التربه بالمحراث

واعروق الجِذِع من مايه متغذيات

مو مثل الشجر هالنخله ليها طور (فصول السَّنة)

ولا مثل الشجر تسقط لها الوَرْقات

من يِيْبَس خَضَرها وخُوصها ولْعدوق

تِظل داخل جذعها ابليف ملفوفات

من تثمر اعدوق النخله بالتنبيت

من حول العِدق بالسِّلَّه محفوظات

من طبع الثمر خالقها رب الكون

ما تِذبل ولا تِبلى مع الاوقات

وحيده التمره ما شفنا مثلها اثمار

تبقى الحول كامل حِلْوة النضرات

سر الدِبِس وزناته على الفلاح

بالچندود لمّن تبقى مچنوزات

يستانس ابعالي النخله حتى الطير

عِشِّه يِنبَني من يابس الخوصات

والفلاح من يسمع غِنى العصفور

من يجلس ابعشه تصدح النغمات

وابعين المُزارُع فيها نظرة خير

والنخله ابزمن مذكوره بالشِدَّات

الله اللي ذكرها النخله بالقرآن

من هِزَّي الچذع مذكوره بالآيات

تتغذى ابثمرها اهناك بت عمران

تتساقط رُطَب واتناولت فردات

چنها النخله تعرف دعوة الانسان

مو سهله الجدع يضعف من الهزات

لكن قدرت الله النخله فيها اسرار

تسمع للدعا وابمريم الدعوات

لَنْهَا بالدعا صلت على المحمود

من ذكرت محمد نزلت التمرات

……………………………………………..

ابو مصطفى ال يوسف

29  جمادى الاولى 1441 هـ

 24 يناير 2020

قصيدة عاطفية غزلية

…………………………………………….

يِمْتى ايْدُق عليه الباب هالغالي

وفتح له اقليبي قبل باب الدار

وسمع من يدق الباب بييدينه

من دق المحب دقات قلبي اتغار

وسرُع من يجي بالباب محبوبي

ووقف بالوَله ونشد لِهْ الأَشْعار

يطربني ابمشيِّه من يِخَطِّي الباب

كل خطوه ابنغم يعزفها عالاوتار

وشم طيبه لِمْعطر من ازهار الروح

ينعشني النَّفَس من هبّة الازهار

ملامح من جماله بيَّنتها الريح

من يوم الهوى لامس وجه لخمار

من بسمات وجناته تحت لحجاب

يخفي ابهالحجاب امن الجمال اسرار

يسحرني بعيونه وناعم الخدين

اشوف ابخده لَمْعَت دانة المحّار

من يبعد حبيبي تقترب لهموم

قربه من حياتي يبعد الأكدار

اذا اسأل عن احواله يظل مسرور

وحس ابضحكته وابقلبي يدري اشصار

ماعنده زعل والطيبه فيه اتبان

يشرق ببتسامه والزعل ينهار

اهدي له ورد لكنه غير الناس

ورداتي يِشُكْها حول صدره إسْوار

هداني مِعْطفه وابعطرُهْ الفوّاح

كان اعلى الصدر من عطرُهْ لِه آثار

من صافي الذهب صوغه الِه وديت

وابسرعه سألني وداهْشِه المعيار

مثل هذا الذهب ما مر عليه اسنين

ماريد الكلافه والذهب بك صار

جاوبته اعلى شانك وانت عالي الشان

شاريه ابزمن كانت اله تجار

من اهل التجاره راحو الطيبين

من صوغة ذهبهم ينعرف جبّار

بهديه ابغلاته لجمل الاحباب

يرخص لك ذهب لو غلّته الاسعار

مريت ابحياتي بَجْمل امحطات

وجملها ابحبيبي جِمعت الاقدار

كل وقت انقضى وياه ماحِس بيه

لأنْ وقتي معاه الينحسِب اصفار

أمِل اغيابه وجْلس جلسة الحَيْران

ما مِل قعدته ويايْ ليل انهار

لو سُولَف اظل اكتب ابقلبي اشگال

كل كلمه ابشفاته تنكتب تذكار

ارتاح ابوجوده مبتسم فرحان

يشعل مبسمه من حسنه الانوار

محبوبي وَفي ما غاب عني ابيوم

لو ما يعتذر قدمت انا الاعذار

بير الحب عميقه سهله عالناعور

لو يطلب حبيبي لنزف الآبار

اوَصْفَنَّه حبيبي جود فايض ماي

وبحسنه أناظر جنّه بالانهار

اذا يِقْبِل حبيبي شُوفه يِملي العين

اذا صار ابُّعٍد بُعْدِه بِجْروحي إشْفار

داواني ابوقت ما كنت اظنه يعود

لكن من سمع عن حالي رد اسفار

لليوم ابحياتي ما نسيت اوفيه

ابقاموس الوفا كاتب حبيبي اصْدار

نار العاشقين انكتبت ابتاريخ

ذابت كل ورقها وسالت الاحْبَار

ماظنها المحبه تنصهر وتذوب

تبقى ذكريات العاشقين اجْمَار

يلوموني يقولو بالعشق مجمور

ترى جمر العشق من قبله شَب النار

لو يحصل نعيد الزمن باللحظات

يرجع كل عمرنا وتخلد الاعمار

…………………………………………….

ابو مصطفى ال يوسف

13 يناير 2020

18 جمادى الاولى 1441 هـ