حوارية بين الامام الحسين عليه السلام وفاطمة الزهراء عليها السلام.
……………………………………….
يبني مِنْ هُوْ لُك مثيل .. عايش اودمّك يسيل
زلزل العالم نَزِف نَحْرك عجيبه
……………………………………….
(1)
هالجروح اللي تحس كلها تِألْـمَك
بس جرح واحد ترى ولباقي لُـمَّك
تنزف ادموم ابقلبها اتصير دمَّك
وبصدرها اوداع نايم يوم ضَمَّك
امَّك ابحالة ذهول .. نجمك ابحالة أُفول
والنجم لمن افل اعلن مغيبه
……………………………………….
(2)
ماخذ السجاد من قبري هديه
تحفة اتراب اللحد للاوحديه
مثل ما بالباب سبب لچ اذيه
هم ضلع لي منكسر بالأعوجيه
من توّصل تحفتي .. ردّي يُمّه ازيارتي
وَرَتَجي لِزْيارِتِچ يُمَّه قريبه
……………………………………….
(3)
يَبْني عنُّك من سأل شَعْطِي جوابي
قولي جالس باللحد يحفر صوابي
ادري يا يُمَّه اشكثر قاسي خطابي
لو تِعَذر هالامر ذِكْري مصابي
قولي ما يخلف وعد .. وِلْوَعَد عندِه عَهَد
من وصْيته تنقرى بالطف مصيبه
……………………………………….
(4)
قولي باع اوليدي روحه هَم تِهَـنّه
قولي ليهم باللحد شاري له جنّه
لَيَّه هَم رِضْوان بالجنّه تِعَنّه
بس يريد ابجنته يدخل تِمَنّى
باللحد بس مُخْتصُر .. باقي بالجنّه اشْكِثُر
قولي ليهم باع بالدنيا نصيبه
……………………………………….
(5)
يبني عَنّك كربلا كتبت قصايد
خيمتك بالطف ترى صارت مشاهد
متحف التاريخ صارت هالمراقد
كلها زوّار اعتنت ليكم تعاهد
كل ارضهم كربلا .. جنّة خلّوها الفلا
عاشر ابعاشور صرختهم مَهيبه
……………………………………….
(6)
چنت اسايل عنِّچ المختار طه
ابجنّة الفردوس ما اسمع نداها
قال راحت كربلا تنصب عزاها
ترجع ابمنديل للمحشر بچاها
تمتثل لمر الجليل .. تطلب ابثار القتيل
ترجع اوياها فدك ولحق تجيبه
……………………………………….
(7)
بالمنابر نهضتك يحسين تِصْدَح
منهج الاصلاح ولْعَالِم لِه يِشرَح
أمُر بالمعروف واخروجك تِوَّضَح
وِلْحيات اتعيش دمّك بيها يِنْضَح
يضوي ذكرك للأنام .. ينكشف عنها الظلام
تدخل الاسلام كلها ابْلَيّا ريبه
……………………………………….
ابو مصطفى ال يوسف
21 ذو الحجة 1438 هـ
12 سبتمبر 2017
