…………………………………………
كل اللي جرى مسطور .. احسين إلْكاتب الدستور
من عاشُر .. اله ساطُر .. من نحره ارتوت اقلام
…………………………………………
(1)
ابقاموس الكرامه الذله محذوفه
زينب هزْمَت ابن ازياد بالكوفه
دارت كالرحى هم طحنت اصفوفه
صَرْخَت يا عَلي قَصْرُه انْهَدَم طُوفَه
بعد ما وجهت توبيخ .. حِذْفَتْهُم من التاريخ
الف وسفه .. ضرب چفَّه .. ابن ازياد ابمذله هام
…………………………………………
(2)
لابن ازياد زينب ظلّت اتناديه
إرْجَع للذُّكُر تِفْهَم اذا قاريه
بارينا الذُّكُر من حافظ امخليه
حيْ بِينا الوحي والذكر ما تمحيه
قِلْبَت مجلِسَه طوفان .. من بعد الفرح بحزان
نُفُوس إلْهُم .. تحس انهم .. ذنوب إرْتِكْبت وآثام
…………………………………………
(3)
تقرأ المصحف ابتجويد واتفسرَه
تعرف مِن تِخَاطب زينب الحره
هي اخت الإمامه وابنة الزهره
عمّه للأئمَّه وبذرة السدره
عند السدره ولجنّه .. جدها المصطفى اتعنى
شفيع امَّه.. دنى يمَّه .. حجاب القدره وِلْإلْهام
…………………………………………
(4)
تنشر منهجيه ابموجب التكليف
شموخ الواقفه ابهيبه عطت تعنيف
تكشف منهج ابن الزياد والتزييف
تشرح كربلا ابصوره بلا تحريف
زينب كربلا صارت .. خلف احجابها وارت
منطقها .. تعرفها .. اذا تحچي ابْحَدِّه احْسام
…………………………………………
(5)
زينب بالسفر كل خطوه تتمنّى
تنشر للبشر دستور واتسنّه
من تهتف احسين اتوّصِل الجنّه
جنّه ابكربلا كِلْ مِنْ لَها اتعنّى
زينب تقصد المضمون .. جنّه احسين لو توعون
قِيَام احسين .. لاجل الدين .. نهجه يِحْفَظ الاسلام
…………………………………………
(6)
ميْأذِّى العقيله لا دمِع لا نوح
كل مجلس حُسيني للنعي مفتوح
اكثر ما يأذي كربلا بلجروح
منبر للحسين ابلا فكر مطروح
يظل هذا البچي نوماس .. حِزِن نفضح بِهْ الارجاس
هالدمعه .. تظل شمعه .. تِضْوي وتِشْعِل الأفهام
…………………………………………
(7)
زينب وبحزنها كِتبَت اروايه
قصتها عظيمه فيها كم غايه
فصل العلقمي ما يحمله مايه
خذ حتى الرضا تشهد لها الايه
رضى الرحمان شاهدها .. ذبيح القربى مقصدها
له جبريل .. بالتظليل .. ناشر جنحه عالآلام
…………………………………………
ابو مصطفى ال يوسف
27 ذو الحجة 1438 هـ
18 سبتمبر 2017
